cc.chow的個人專頁

入到呢間餐廳同去到泰國無乜分別，因為所有裝飾都好泰式，好地道！連個卡位都好似去咗泰國皇室咁～先試個細嘅泰式蟹肉魚肚羹，入面真係有鮮蟹肉，好味道！口感濃稠適中，好味！呢度係半隻泰式香燒雞，有啲咖哩風味，好香口惹味，雞肉都好嫩滑，讚！泰式濕炒牛河，呢個都好好味！炒得夠濕，而且係用勁大塊嗰隻河粉，完美還原泰國當地嘅濕炒河感覺！鐵板蠔仔蛋，超香脆，啲蠔唔腥亦好juicy!好味～呢度飲品都好有特色，試咗雜莓黑加侖子變泰紅茶同手打香水檸檬變泰綠茶，好飲又解渴！…查看更多

落巴士見到呢間餐廳好文青風，睇睇menu 原來係食餃子嘅，就入去試試～叫咗個家常手作餃子套餐（$98), 有好多口味可以選擇，我哋揀咗黑松露三重芝士同粟米豬肉味，餃子係點意大利香醋，味道都唔錯，香濃嘅黑松露味同芝士都幾夾，而粟米豬肉味就正常ok! 餃子賣相都好精美！野飲試咗Hojicha latte, 都唔錯！除咗食物之外，原來飲品都好有水準！另外試咗個All Day Breakfast ($128), 呢個餐超豐富，乜都有咁滯！主要都係想試個熱香餅多士，超滿足～店員推介咗個Red Velvet Cake ($65), 口感好綿密～食得出製作好用心！值得支持！…查看更多

第一次黎錦田呢個天空之城，原來入面都好多野食！今次黎試泰國菜～每次食泰國菜都必食蒜蓉包，係厚多士切條整成嘅蒜蓉包，外皮香脆，內裡軟熟，好味～椰汁雞湯，湯底係奶白色，好香椰汁味，同時有泰式嗰種酸味，入面有雞同菇等食材，好惹味！燒豬頸肉，呢個都好正！點特制嘅醬汁食味道更加好味，肉質肥瘦適中，唔錯！西蘭花炒鮮魷，鮮味十足，唔會太濃味，食嘅菜可以消下滯～泰式炒飯，呢個就味道偏淡，較為健康，可以一試！餐廳外面都有提供泊車位，都算方便！…查看更多

鄰居介紹呢間餐廳幾好食，今日lunch 黎試一試！午餐set 都好多選擇，款款都好吸引！揀午餐前想試試個肉醬薯條先，好香脆好味！仲有個煙燻時令與刺身，煙燻效果氣派十足，刺身都有滿滿嘅煙燻香氣！午市套餐都會奉送餐湯（紅湯/白湯）同餐包，餐包係黑糖麵包，每款湯都試一試，羅宋湯都幾有水準，而南瓜湯都唔錯，口感好幼滑～男友人叫咗個三成熟嘅炭燒紐西蘭肉眼扒，跟薯蓉同紅酒燒汁，$148 午餐黎講都算抵食！牛扒有啲厚度，有炭燒坑紋，切開後肉質好粉嫩！味道非常好！我就三文魚貓意粉，係用馬斯卡彭芝士汁煮成，入口勁濃芝士味，超creamy!跟餐會送佛手柑鐵觀音茶，+$28可以升級水果茶特飲，呢壺係士多啤梨芒果茶，可以自己diy 味道，都幾特別！另外+$28可以追加乾果乳酪杯，食埋甜品超滿足！…查看更多

雖然雙子滙人流唔多，但原來搭𨋢上黎有好多野食！上到14樓嘅食滙堂，人山人海，間間餐廳都坐爆哂，我地揀咗好多分店而且口碑唔錯嘅泰國餐廳新泰。入到去有種去到泰國住酒店，朝早食酒店早餐嘅感覺，好泰式！同其他分店好唔同！由於友人係魷魚愛好者，先叫個原隻魷魚筒比佢！隻魷魚相當大隻！汁燒味道好惹味，可以點少少泰式酸辣汁解膩，希望膽固醇唔會飆升啦～口感方面好軟滑彈牙，值得一試！今晚大家都唔太肚餓，以生菜肉碎包作為主食，雞肉碎帶微辣，用爽脆嘅生菜包住嚟食口感好清新！肉碎炒得好香！另外試咗個蒜蓉炒貴妃苗，賣相好翠綠，食落口感比較多纖維，要加多幾分牙力咬一咬，不過味道係唔錯嘅。最後唔少得食個泰式明爐烏頭魚，魚肉唔腥之餘仲好嫩滑，酸酸地咁好開胃！…查看更多

電視見到有介紹，見到好吸引，所以落嚟試吓！先試呢度嘅名物：蝦子撈麵！撈麵夠乾身，唔會腍bat bat, 口感彈牙，將蝦子撈勻之後，味道好香濃！必試！撈麵會跟一碗湯，飲落似係魚湯，好鮮味！另外試咗個牛腩撈麵，牛腩嘅肉質唔錯，軟硬適中！推介！而水餃麵都好正！賣相同一般嘅水餃唔同，好大粒好足料，好味！腩汁蘿蔔，夠腍，索晒腩汁更加好味！炸鯪魚球同炸雲吞，炸出嚟一啲都唔油，火喉控制得好好，香脆惹味！蠔油生菜都好爽脆～最後試咗杯紅棗豆漿，養生之選！…查看更多

見到元朗體育館附近開咗間漢堡包店，店面睇落好乾淨，有少量座位，我地就買外賣返屋企食～menu 上全部都係手工burger, 睇啲配料好吸引！我哋叫咗個$248嘅二人餐，有兩個burger兩份小食同兩杯嘢飲。千島脆脆哈蝦蝦漢堡，入面嘅配菜有蕃茄，洋蔥，生菜，千島醬都落得好夠，有三條蝦手指，炸得都唔錯！包面有烘過，正！雙層手打牛肉芝士漢堡，芝士溶咗之後味道更濃，同快手打牛肉味道好夾！而且牛肉煎得啱啱好，免頭有少少脆，好味！炸大薯條，配黑松露醬，好香口！炸洋蔥圈，配蜜糖芥辣醬，好惹味～嘢飲方面，除咗汽水之外，推介藍莓爆爆，係由藍莓醬+爆爆珠+梳打水溝埋，好特別，有口感又解渴！…查看更多

友人搵到喺尖沙咀有間特色泰國菜，食完覺得真係唔錯！位置旺中帶靜，入面座位唔多，睇落似係做酒bar 生意，但原來食物都整得好專業！先試個安格斯牛肉沙律，沙律醬帶酸，同生菜mix 牛肉嘅味道好夾，而且唔係用普通嘅牛肉，所以口感相當有保證！炒芥蘭，有泰式風味！豬肉生菜包，少辣，不過好惹味～生菜爽脆解膩。椰子雞湯，好香椰子同香矛味，雞肉嫩滑，大量草菇，飲完好滿足！蟹肉蛋餅，份量十足，蟹味香濃。魷魚筒，友人至愛，魷魚入口柔軟，不錯。燒豬頸肉，又係好大份，好香口，正！…查看更多

一直都好鍾情於食手工拉麵，難得見喺元朗開咗間中式拉麵店，當然要試試！呢度除咗拉麵，仲有好多小食同小菜～先試半隻湛江水蒸雞，都幾新鮮，肉質彈牙結實但又唔會好硬，有咬口，雞味都有，唔錯。羊肉串味道香濃，想食串燒都可以試試。藤椒魚皮，雖然係辣，但會心思思不斷食，口感爽脆，鍾意食就會明。生煎包，應該係招牌野，底好脆，多汁，合格。酸菜魚拉麵，個湯底會令人念念不忘，走辣一樣咁好味，拉麵係即場人手拉，食落真係唔同，麵條都好掛湯，正～紅燒牛腩拉麵，呢碗試咗龍鬚麵，再幼少少，湯底好香濃，牛魔王必試！…查看更多

喺yoho 對面，見到好大個招牌寫住有火鍋，睇餐牌被湯底吸引到就入去試試！睇餐牌已經覺得係間有認真經營的火鍋店，湯底設計好特別，我地就叫咗個平時好少見嘅冬瓜雲腿素翅湯底。本身以為係嘅普通養生中式清湯，點知原來真係有原個大冬瓜喺個鍋度！金黃色素翅閃令令咁鋪喺面，真係令人食慾大增！煲到咁上下店員會幫忙剪開個冬瓜，服務周到！唔少得火鍋必備嘅混醬～牛肉揀咗馬扇古吊龍伴，呢個部位真心推薦，肉同油脂比例剛好，口感好嫩好柔軟又重牛味，值得細嚼品嚐！而且色澤紅潤十分新鮮！食完牛肉啲冬瓜差唔多夠林，湯底亦變得再濃咗，冬瓜入味，濃湯又好正！然後再試咗個小菜客家豆腐，都唔錯，煲仔上夠惹味，豆腐都夠滑！最後食個瑤柱蛋白炒飯，炒飯唔油，好味！…查看更多

終於黎到拜訪平昌！想食韓燒好耐了！！我地揀咗個世子御膳，星期一至四食120分鐘，加一後價錢$350, 都算合理～有齊牛豬雞同海鮮，我地就主打牛肉！趁男友人燒緊肉，先食碗水冷麵，麵條好煙韌，個湯汁酸酸甜甜，食親韓國野一定要食返碗先安落。叫咗各式各樣嘅牛肉，講真食完真係唔記得自己食咗邊款，總之全部都好新鮮好食！睇相都feel 到。牛前胸腹肉有大量油脂，但入口又唔會好油～牛舌係必食，夠薄易入口！T 骨牛扒同ribeye 都可以試，超大塊，好考燒嗰個人嘅技術！韓式料理都有好多款揀，我地仲試咗牛骨湯，紫菜飯，炸粉絲卷等等，仲有供應醬油蟹，都幾抵食！…查看更多

喺銅鑼灣嘅樓上舖發現到間正野，食物水準好高！先叫咗碗究極炎之丼比自己獨自享用，唔建議share, 因為真係太好食！入面有大大粒嘅帆立貝，油甘魚蝦，左口魚等等，輕輕炙燒下個感覺真係唔同哂，材料新鮮，大滿足！男友人都唔輸蝕獨自食咗個蟹皇丼，有成座山嘅蟹肉，蟹籽嘅香葱，個蟹皇汁好creamy, 好出色！除咗丼飯，啲小食都唔錯！京蔥地雞配芝士忌廉汁，有啲似韓國炸雞但又配西式嘅芝士忌廉汁，出奇地好食！薯條仲可以點埋個汁食！鰻魚芝士玉子燒，玉子燒得好juicy, 有半生熟嘅口感！粟米天婦羅，幾特別，愛粟米之人可以試！海膽右口魚邊蝦卷，右口魚口感超油，配海膽一齊食好好味！！一人一杯抹茶牛奶，香濃抹茶+香滑牛奶！…查看更多

又到咗同友人相聚嘅一晚，今晚選址荃灣，餐廳近荃新天地，旺中帶靜，晚飯時間都坐滿哂！坐低先叫個沙律享用，呢個係Prawn mango avocado salad, 超大盤好足料！！淨係牛油果同芒果都成排上，夠哂食唔洗爭，爽口嘅蝦肉同酸酸地嘅沙律菜一齊食好fresh~~友人要求點嘅Chicken nachos, 又係好大盤好抵食！nachos 好脆，同啲芝士醬焗埋一齊實在太正！點埋秘製sauce 根本停唔到口！Main course 叫咗個Ham in pineapple pizza , 賣相好地道，新鮮即焗，而且係薄批，同批面嘅餸比例剛剛好，口感好正！甜品 share 個Sunday chocolates , brownies 嘅朱古力味超濃！…查看更多

今晚想買外賣壽司返屋企食，發現呢間食物好多款式咁，就出發去採購。嚟到發現價錢唔太貴，買咗啲壽司同刺身小食，同拉麵作為今日晚餐～啲壽司好大件下，好足料，而且好新鮮！舊鰻魚係長過舊飯，好少有，正！珍寶帶子又係超大嚿，一啖呑入口勁滿足！滿滿蟹膏嘅軍艦，勁惹味！腐皮沙律船同腐皮芝士玉子都好特別，口感豐富，餡料同甜甜嘅腐皮好夾！三文魚同三文魚腩刺身都切到好厚，好抵食！買咗罐撈汁墨魚咀，好有咬口，不過都幾辣～叉燒拉麵分湯裝，好多料，叉燒好冧又大塊，仲有原隻糖心蛋，湯底濃郁，食完飽哂！…查看更多

是日同友人相聚，想搵個靜靜地嘅餐廳傾吓偈，友人好貼心搵到呢間好lady 嘅餐廳仔，入面燈光比較soft, 感覺好warm, 而且野食都相當唔錯～因為友人今日晏食野，所以到晚飯時間都未餓，咁我地就淺嚐少少無咁飽肚嘅野。食沙律就最啱唔肚餓嘅我地，叫咗一個柚子大蝦沙律伴秘製甜酸汁。賣相好清新好吸引，個甜酸汁好開胃，沙律菜好脆好新鮮，蝦都好彈牙，有助我地消化一下。再試下煎盲曹魚柳伴香辣蕃茄莎莎，魚味好香無腥味，同蕃茄醬都幾夾，仲有薯蓉伴碟。甜品試咗提拉米蘇, 口感好綿滑，唔太甜，整得幾有心思！飲品試咗white orchard, 茶具好精美！…查看更多