theglasgow2010的个人专页

今日有事要去企業廣場，所以就同姑姐兩個人去IKEA食個午餐～兩個人叫咗一份豬手、兒童餐(粟米、魚手指、薯仔）同埋菠菜薯餅、薄荷朱古力芝士餅，最後喺出邊樓下一層叫咗個薄荷朱古力雪糕。豬手性價比好高，大大份切到好多肉出嚟，最後我哋係食唔晒。兒童餐就代替小食囉。本人好鍾意食菠菜薯餅，菠菜味好香，有好少芝士將所有嘢混埋一齊，味道好夾，偏濕潤，係唔熱氣嗰種薯餅。薄荷朱古力芝士餅有驚喜!!!薄荷味同芝士都幾夾，兩樣都唔會太搶，估唔到呢個甜品咁好食。然後試埋薄荷朱古力軟雪糕，好正！！！好欣賞佢個雪糕係深朱古力色，食落去先有薄荷味，如果佢係綠色嘅我就唔會想食，而且味道好好，唔係假嘅薄荷味。出色！…查看更多

樂園已經食過好多次，每次都係因為好夜返到屋企，而嗰個時間附近又冇嘢好食，即係接近11,12點嗰啲位嘅時候，一定就會揀樂園。次次都會叫一碗淨雲吞，淨雲吞有六粒加一條青菜。佢嘅雲吞粒粒都有鮮蝦喺入邊，豬肉唔會太肥又唔會太瘦，瘦嘅話咬落會好柴皮，豬肉同鮮蝦比例幾好，大概一比一，皮又夠薄。試過有一次11:50幾分衝到去，佢都肯俾我叫外賣，所以佢真係我嘅深宵食堂。外賣返屋企食仲好，堂食環境唔算整潔，就係平時粉麵舖嘅情況。…查看更多

喺樓下飲茶飲到悶悶地，舅父就開車，車我哋去遠啲，嚟到元朗呢間名門宴客飲茶。架車仲可以就咁泊喺出邊勁方便。。第一枱就係我哋，唔使等太耐就有位。現場枱與枱之間呢坐得好密嘅，間唔中就會有姐姐捧住一碟碟嘅點心巡場，逐枱問大家啱唔啱食。蒜香石斑蒸飯，大大碟，魚又多，好足料，婆婆好滿意。另外呢間酒樓嘅炸嘢都幾出色，我哋叫咗鮮蝦腐皮卷，黃金百福豆腐、這不是春卷、香煎甘粟花枝餅、炸兩。走晒樣嘅奶黃小刺蝟。服務員動作快手，好主動加水執碟，嚟緊應該會多啲嚟呢度飲茶。…查看更多

每個星期六日都會同婆婆飲茶，因為婆婆唔係行得咁好，所以一定係佢屋企樓下呢間酒樓。星期六日嚟講，呢間酒樓都算容易等位。佢有一張早市優惠點心紙，記得11點前要落單。每一兩個月都會轉一次點心嘅內容，所以都唔係太悶。每次我婆婆都會點鳳爪，因為我唔食鳳爪，所以我就唔評論。淨係知伴碟嘅花生係大大粒。每次見到銀魚仔雞粒飯我都會叫。銀魚仔鹹鹹香香，好好送飯。另外雞粒都夠多，唔會食晒餸冇餸送飯。佢啲豉油豉油都OK ，係有酒樓魔力嗰種。另外都會叫蝦餃燒賣呢啲點心。奉勸各位，如果叫蝦餃，一定要用正價點心紙！唔明白點解用咗優惠點心紙，仲會貴過正價。酒樓真心玩嘢。佢啲水準好參差，一時好得，一時麻麻哋。好似炒米粉咁，有時夠乾身香口，有時濕立立。炸兩呢，中間可以好脆口，又可以淋謝謝，要睇運氣。呢度嘅服務真係麻麻地，可能因為人手不足叫極都唔過嚟斟水。呢間餐廳都有任飲任食點心其實都心郁郁想試，但係真係冇乜機會。…查看更多

食飽米線，經過觀塘港鐵站，甜品癮起，就覺得可以嗌個泡芙返屋企食吓。望住個櫥櫃，見到好多種類，花多眼亂，選擇困難症又發作，都唔知揀邊款好。見到出咗個新品，所以試吓。焦糖脆脆意大利芝士泡芙首先塊餅係好食嘅，同平時嗰啲一樣味道。跟住食上面嗰啲意大利芝士，係真係似Tiramisu嘅。最開心嘅係上面層cream食完之後，入邊都仲有啲原味嘅cream。另外叫咗榛子朱古力布丁泡芙同埋原味特濃吉士比細佬同佢女朋友喺屋企食。…查看更多

今日約咗兩個朋友晚飯，其中一位會帶埋小朋友出席，所以揀咗大樹先生之家。我都係第一次去呢啲親子餐廳，我哋喺坐低睇吓有啲咩嘢食發現價錢都係偏貴，拿刀奶啦梗係要照叫啦，揀咗三個主菜同一啲小食，就去玩嚕。場入面分三個大遊戲區域:第一係波波池、第二沙池、第三係一個自由天地。波波池係幾好玩嘅，夠大同埋都多波，凍大人都玩得。可惜嘅係，入邊有好好多外物，例如濕紙巾咁。感覺唔太乾淨，一般般。然後，我哋去咗自由區域玩，嗰啲扮煮飯仔、坐車。係要除鞋入着襪入去。因為食物到我哋就去食嘢先，食物份量大味道幾好，應該嗌少一個主菜先啱。味道唔錯，因為份量太多食唔晒要拎走。豬手係炸得幾香口、蘑菇帶子飯亦都好creamy、三文魚意大利粉嘅三文魚幾多。呢一餐嘢食得滿意，只係貴咗少少。應該唔會再嚟。…查看更多

今個星期日，因為要去觀塘工廠區拎啲嘢，上openrice搵吓食咩好先。禮拜嘅工廠區冇乜嘢食見到呢有開同埋之前細佬有講過係幾好食，所以決定試吓。一入到去見到只收現金，心感不妙。最後硬着頭皮，埋單佢都肯俾我PayMe解決。呢間舖頭以米線店嚟講，都算係比較闊落同乾淨。坐低叫左個麻辣小鍋薯粉，一餸豬頸肉，熱鴛鴦。豬頸肉有焦香。切到一條條好襟食。薯粉煮到晶瑩剔透。另外碗底有好多肉碎，真係惹味。一開始小小貪心，諗緊好唔好叫兩餸或者三餸，但係諗諗吓因為想睇吓佢嘅份量有幾多，所以都係放棄咗呢個念頭。手機用QR code落單，幾方便。會再食。…查看更多

上網見到呢個熟食中心平靚正，一早已經鎖定目標，衝住呢間鋪頭嚟試。嚟到見到好多人排隊，叫嘢食都要等一段時間。叫左個豬頸肉炒公仔麵同麻辣豬頸肉炒飯，再加份小食雞翼同豬頸肉，熱奶茶同一杯凍奶茶。豬頸肉炒公仔麵，好似係喺隱藏Menu，要識叫先有嘅。公仔麵炒得好香，但係因為我揀飲擇食，所以用咗一段時間撩走啲配菜。麻辣豬頸肉夠乾身，好惹味。好食到即刻WhatsApp細佬叫佢一定要試吓。已成為粉絲，間唔中就心郁想再食。呢刻打緊食評都想衝過去食。間鋪中間有落場時間，大家留意唔好摸門釘。…查看更多

今日由九龍東，遠征入元朗國，就係為咗試呢間cafe。有個小插曲，我以為1:15喺觀塘一齊出發，點知原來係喺元朗等 所以我遲咗好多，唯有請佢哋食呢一餐賠罪🙏🏼🙇🏻‍♀️去到等位嘅人唔算好多，我哋係第三四張枱。可能啱啱完咗午餐嗰一輪。舖頭入邊好細，左邊三張枱，右邊四張二人枱。我哋就三個人坐一張二人枱迫埋一邊。叫咗蟹籽蟹肉明太子忌廉意粉、炸雞、Tiramisu窩夫。每人嗌咗一杯飲品，分別係自家製焦糖鮮奶咖啡、橙啡、同菠蘿薑梳打。個意粉上枱夠大碟，完全係我心目中完美嘅忌廉意粉，啲醬杰程度非常好，唔會太流又唔會太黏，好出色。炸嘅單骨雞翼，好香口。Tiramisu窩夫好味。不過，杯焦糖脆脆咖啡較甜(已經叫咗少甜)。埋單，$412,無加一。對得住價錢。其他嘢可以唔叫，但係意粉就係必食。…查看更多

今日放工，約咗位好耐冇見嘅朋友食飯，因為好想食明太子(去完九州後遺症?)，所以就去食壽司郎(呢期出咗好多明太子嘅食品)。小插曲係我哋兩個分別去咗禾輋同埋新城市分店。最後，梗係禾輋分店食，少啲人等位。因為主要係想食明太子，所以一坐低就叫咗明太子沙律醬同薯條。之後食左一輪帶子、蝦、燒牛肉(推介，平靚正)同平時一樣keep住新鮮嘅好味。我食咗好多嘢，枱上嘅薯條都凍晒，但個明太子醬仲係未出現，所以就問吓店員，然後再叫咗其他嘢食。食完第二round，個醬仲係未到，所以追問，又再過多陣，都未見到，忍唔住同佢講我其實已經問過幾次，點解都仲未有嘅。皇天不負有心人，千呼萬喚始出來。兜明太子醬終於上枱，要嗌熱辣辣嘅雞軟骨去點醬。個醬有微微嘅明太子辣，點炸嘢一流👍見到好多 小朋友齊打交嘅周邊，都食咗個芭菲支持下。…查看更多

商場行過見到亞金下午茶幾抵，所以同阿媽入去幫襯。餐牌好多選擇，諗咗一輪之後，最後因為都幾肚餓，兩個人都揀咗豬扒飯。個飯一上枱見到有啲油，食完個底都真係好油。但係好在個太陽蛋又煎得幾靚，大大粒蛋黃又黃又橙好吸引；豬扒有醃過，煎過幾香口，可惜份量唔夠多。目測兩碟飯嘅豬扒大細爭好遠。仲有啲塊豬扒嘅邊係有一層好厚嘅肥膏。最後因為唔夠飽，所以叫多個鮮油咖央多士。先有喺圖所見，係有啲厚度嘅。咖央唔係搽得好夠，可以再多少啲咖央醬，食落口牛油味重過咖央好多。…查看更多

今日同同事搭車過食晏。喺舖頭裝修完第一次過嚟食，記憶中啲便當係好豐富，乜都有嘅。啲位都幾窄幾迫。Menu選擇好多，猶豫咗好耐究竟揀邊款。最後點左沖繩便當($100)入邊有刺身(兩片三文魚、一隻鮮蝦、一片帆立貝)，前菜(螺肉）、小食(金菇牛肉卷）、餸(芝士吉列豬扒)同主食咖喱飯，冇包嘢飲。味道好、食物內容夠豐富，但係一個晏要食成$100，仲要唔包飲品，好似有啲小貴。間唔中會再過嚟食。但真係好間唔中。…查看更多

今日同同事去禾輋食晏，見到依間新開嘅餐廳，入邊滿得嚟又唔使點等位，所以就入去試吓。餐廳安排咗我哋兩個人坐卡位，有啲受寵若驚。我:冬蔭炒意粉配豬頸肉$65 同事:就嗌咗泰國豬頸肉炒水晶粉$65一上枱，嘩！咁大嚿豬頸肉嘅，啱晒我呢個食肉獸。勁多勁大，搞到我都有啲招架唔住。個東　蔭係幾好味嘅。而同事個水晶粉就係得咁dur dur，好似有啲細份。係我會唔夠食囉。我都試咗一啖，味道係幾唔錯嘅都。如有機會會再嚟幫襯。…查看更多

今日做完Facial，就去咗朗豪坊搵嘢食，見到呢間食北海道湯咖喱嘅突然之間好懷念所以就入咗去佢有Menu俾你睇，然後用QR code落單。最後我揀咗炸雞髀。然後同北海道唔同，就係佢可以揀飯、烏冬or拉麵。雞髀大隻，feel到係即炸嘅，因為仲脆嘅。而拎開咗隻雞髀之後呢，就係最懷念嘅北海道蔬菜。平時我係食肉獸嚟嘅，但係北海道湯咖喱嘅重點係新鮮嘅蔬菜。啲蔬菜同我哋平時食開嘅味道好唔一樣，係有北海道嗰種新鮮。南瓜好好食。下次懷念北海道又可以再嚟食過了。…查看更多

見到有買一送一優惠，我表妹買咗一杯，但係因為等太耐，等唔到，所以叫我呢個住附近嘅表姐落嚟拎咗杯嘢飲佢。14:57落嘅單，等到17:09先出到貨。中間仲係keep住賣俾人，去到某個位(大概16:45?)佢知自己應該唔會出得晒今日嘅單，終於暫停售賣。牛油果鋪面，個底係乳酪，但係冇乜乳酪味。成杯嘢剩係得個凍字。冇乜味道，唔甜唔酸。飲完好飽好濟，總之就浪費咗啲卡路里。吸引唔到我，要俾原價嘅話一定唔會買，就算再買一送一都唔會再飲。…查看更多