carol0728的个人专页

今日特登去左佐敦呢間cafe試下。外面睇細細間，餐廳室內大約容納到20個人，室外有6個位，如果一大班人，唔建議揀呢間餐廳。餐廳好早收，我見大約3點半就截龍，我食到5點左右就走，我諗5點半，6點就會收鋪。我係星期六下午2點半後到，都排左一個鐘先入到去，真係等得先好黎。上面講左好多負面野，但其實我覺得間餐廳係唔錯嘅。環境：雖然細，但乾淨企理，座位唔會非常迫，當然都唔好expect係好大張枱。服務：正正常常，幾個後生女，算有禮貌，手腳反應都快，你嘅要求佢會盡量滿足。價錢：中價偏高，但勝在明碼實價，唔收加1食物：Bangkok ($168)全餐MVP，最好食就係佢塊厚切煙肉，半肥瘦五花腩，燒得好香脆，啲油脂配埋下面個酸種多士同埋炒蛋，平衡返個油脂感，好好味。Must try item。Yorkshire ($148)賣相好好，但係味道唔算好出色，豬肉腸有少少香草味，但係都唔係特別好食。鐵鍋鬆餅好大塊，差啲食唔晒，有少少蛋香，不過不失。佢仲有啲茄汁豆，煎蛋，同埋沙律菜，仲配一塊燒肉。成個組合唔係唔夾，但係唔係夾到話好好食。味噌焦糖咖啡味道普通，拉花好靚。鐵觀音朱古力 ($60)有朱古力味，都有茶味，平衡得幾好，又唔會太甜，不過飲到最後啲冰溶咗，有啲唔係好夠味。焦糖布甸蛋糕上面層焦糖真係脆卜卜，又唔會太厚，啱啱好。個蛋糕又唔會太甜，又食到有焦糖味，都幾唔錯，推薦。整體嚟講環境味道都唔錯，係價錢貴咗少少，我會為咗佢個厚切煙肉，再幫襯，因為真係幾好食。如果可以唔使排咁耐隊，就更加好。…查看更多

環境：懷舊復古風，入面係好似課室咁嘅枱凳，坐得唔係咁舒服。但都算乾淨企理，座位貼咗牆紙嘅地方有啲甩甩地。食物：賣相同味道都好一般。叫咗：煙三文魚牛油果沙律一上枱，非常細碟，$98呢個價錢真係好唔抵。芝麻雞翼呢碟係最好食，同埋賣相最好嘅，但係水準都只不過係正常水平。龍蝦汁鮑魚燉飯個飯味道好差，冇乜龍蝦味。不過個鮑魚就幾入味。黑松露菌意粉冇乜黑松露味，意粉唔掛汁。叫咗三杯茶飲，賣相好普通，如果用正價$40飲，真係會覺得好唔抵。雖然跟餐半價，都唔覺得好抵。性價比：低服務：正正常常，侍應唔係特別有禮貌，又唔係冇禮貌。不過坐咗好耐都冇人俾水，要自己去問人拎。食完之後去睇Google comment，有人話呢度又貴，又油，又唔好食。真係會心微笑左一下🫠。不過見到隔離枱食burger同甜品，賣相好似好啲，唔知係咪呢啲會好食啲，雖然我見隔離枱都食唔晒。🤪🤪…查看更多

餐廳環境：佢係一個open area入面，冇牆，啲人行過都望到。放左好多枱櫈，行係上黎有啲迫。不過每張枱都放置左個細筒俾人扔雞過，而且有手套，都貼心，整體環境一般。食物質素：食物質素高，比一般炸雞好食，而且份量多。服務員態度：服務員態度一般，黑面神咁。一行2人，叫左個秘製黑炸雞套餐。首先係主角秘製黑炸雞到場 $208炸雞外脆内軟，炸粉唔厚，加埋黑醬汁，甜甜地，唔會太乾，面頭有啲炸蒜片，令味道更複雜，果然係炸雞界Prada 。份量偏多，2個人未必食得哂。黑芝士波波 $70芝士波波外皮好硬好脆，望落個樣似黑丸。裹面好軟熟，甜甜地，好味。套餐送2杯梳打，食炸雞會好口渴，一定要飲野。飲品唔算太甜，清新，幾好飲。其實佢仲有啤酒，cocktail飲，不過太貴喇，所以冇叫。…查看更多

星期日下午茶去食，人流超級多，差啲冇位錯。環境：非常多人，有啲人喺度做功課，有啲人喺度補習，有啲人則坐喺度係咁傾偈，環境有啲嘈吵，同埋擠迫。但係一出地鐵站就見到個Cafe，非常方便。價錢：價錢同一般Cafe差唔多，但係如果有特定信用卡買一送一就更加抵。服務：基本上都係自己去counter買嘢食，冇乜服務。玫瑰鮮奶咖啡有淡淡的玫瑰香味，幾好飲。法式焦糖燉蛋風味鮮奶咖啡一般般，冇乜焦糖味。Opera蛋糕Opera蛋糕就幾好食Montblanc 蛋糕栗子蓉好有栗子味整體來講覺得蛋糕幾好食，飲品就冇乜特別。…查看更多

星期四晚飯時間去食，冇乜人，唔洗等位。環境：2個人坐卡位， 十分寬敞，環境乾淨衛生。價錢：性價比唔高，要用特定信用卡，有折，先抵食。食物質素：中規中矩，唔係特別突出。服務：侍應有禮貌，可惜唔太夠人手。叫咗兩個面， +1個小食，食到好飽，仲外賣左一碗糖水添！慢煮口水雞拌麵呢個幾好食，拌邊面唔會太乾，唔會太濕，口水雞都唔會太辣，但又好惹味，好滑，整體來講都算唔錯。犇牛四寶麵湯汁唔夠濃，牛肉尚算滑，整體來講一般。豚肉餃子正常餃子味，冇乜肉汁，都係一般。段純貞芋圓4號甜品份量超級少，一打開蓋，半碗都唔夠，味道都唔錯，芋泥同紫薯泥都好味，但食得多會覺得口乾，因為佢啲椰汁唔夠。…查看更多

情人節唔想去食西餐俾人劏, 所以一行4人去左西貢食海鮮, 一直對西貢海鮮街嘅印象係劏遊客, 所以冇乜本地人去食, 但有見疫情期間小左遊客, 同都有朋友介紹話幾好食, 所以黎試下, 起碼情人節都冇人價先, 跟番閒日menu, 有得叫海鮮set. 我地叫左個5份海鮮set (平版~1000, 貴版~1100 免加一), 有生果同炒菜送. 總括黎講海鮮係幾新鮮嘅, 淨食海鮮都夠飽, 但某幾碟就會稍嫌偏貴, 如果我以每碟200蚊黎計. 不過大時大節唔加價, 食完可以去海傍行下飲杯野, 都算係一個幾好嘅體驗.推薦: 5/10環境: 唔知有冇室內位, 不過好似9成都係室外位, 情人節當日有小小凍, 舖頭有提供火爐仔, 同埋都cover嘅, 只係野食都會幾快凍. 好彩當日食煙嘅人唔算多, 唔知舖頭有冇分到吸煙區服務: 中式餐廳黎講服務都算唔錯(餐冇收加一, 只有啤酒收加一), 侍應都有禮貌, 都好快回應到客人需要.野食: 椒鹽鮮魷合格, 唔算好好食, 200蚊黎講偏貴, 唔係件件都完整, 有d碎魷魚白灼蝦個質感好硬淨新鮮, 食落都好新鮮, 都算多蝦, 成碟只有1,2隻係梅.上湯龍蝦伊麵可以揀芝士或上湯, 份量都大份, 龍蝦就一隻到啦, 揀左西澳龍蝦, 味道OK豉椒炒蟶子4人份量俾左6隻, 200蚊就唔抵lor, 但都新鮮嘅蒜蓉蒸扇貝首先佢真係扇貝, 唔係用殼加個急凍帶子(喺西貢都真係食過), 不過得4隻, 200蚊有d貴, 但係味道OK嘅…查看更多

1,2星期前book位都好彩book到9位, 今次主題係「星級港式滋味」, 姐係一啲港式食物再加d twist (eg黑松露醬鮮蝦膠煎釀三寶, 咖哩汁鮑魚魚蛋) , 有幾樣食物都幾有驚喜, 整體都值回票價(節錄自官網)由2月6日起至3月31日，咖啡廳將於自助晚餐時段呈獻一系列「星級港式滋味」特色美饌，以矜貴食材重新演繹多款耳熟能詳的經典地道美食，包括懷舊花膠虎蝦乾油渣麵、黑松露醬鮮蝦膠煎釀三寶、咖哩汁鮑魚魚蛋、港式鵝肝醬松露西多士、黑毛豬臘腸及鵝肝潤腸臘味糯米飯及北海道牛奶燕窩蛋撻。一系列港式經典美食，加上海鮮及來自世界各地的特色美饌，你又怎能錯過？環境:五星級酒店, 衞生服務都唔會有咩問題. 拎野食方面都算分得幾清晰, 亦好小出現要排好耐先拎到嘅情況, 坐位都闊落, 每枱都好有私人空間.服務:值得一提嘅係拎野食嗰時自由度都好大, 例如想要走某d配料/要某d部位, 大家可以去explore下野食:海鮮刺身都係一般大路野, 冇生蠔, 都算新鮮, refill得快其他大路野唔逐一介紹-有ham食, 不過都30個月都偏咸-signature肝醬今次係雞肝, 任你cut, 好食-雪榚係自家製, 味道都幾特別, 有咸蛋王肉鬆(真係有肉鬆) / 芒果糯米飯味(真係有糯米飯)-海南雞飯, 食唔到飯嘅可以走飯, 不過個飯都好好食, 必試之一-湯方面中式湯係粉葛湯, d粉葛質素幾好, 好飲, 推介-中湯隔離有龍蝦粥, 好濃蝦味, 仲好足料, 推介overall我覺我係中上嘅, 主要講下今次主題野食. 黑松露醬鮮蝦膠煎釀三寶蝦膠煎釀三寶就冇乜特別, 加埋黑松露醬都ok嘅咖哩汁鮑魚魚蛋食唔出有鮑魚味, 食一粒都夠港式鵝肝醬松露西多士呢個有驚喜, 西多士入面係鵝肝醬, 上面再加一片片黑松露同煉奶牛油, 高級版西多士. 懷舊花膠虎蝦乾油渣麵食到飽去到尾聲先食, 其實都幾好食, 個湯係好濃好creamy嘅豬骨湯, 麵係有d似烏冬嘅麵推介菜色:港式鵝肝醬松露西多士, 懷舊花膠虎蝦乾油渣麵, 海南雞飯, 中湯, 龍蝦粥…查看更多

今年1月個時去左食呢間係朗豪坊嘅Smokehouse Grill, 我係平日去食,一去到都幾full, 由於無booking, 佢安排左我坐隔離嘅Smokehouse Bar bar table, 用同一個menu. 整個用餐體驗都好好, 野食同服務都好好, 坐bar table有驚喜. 有機會會翻食環境: Smokehouse Grill個面就光猛d, 有d位係餐廳外面. Smokehouse Bar就偏暗, Bar Table位夠光, 出面位食野就可能少暗服務: 值得一提既係用餐期間餐廳每人派左一杯有小小酒精既shot, 都好fruity, 容易入口. 然後去到咁上下, bar tender仲特登沖左杯cocktail俾坐bar table嘅guest同其他客人, 都係甜甜酸酸容易入口野食: 趁8點前仲有happy hour, 飲品有8折, 叫左杯draught beer同mocktail, 啤酒選擇唔多, 有erdinger黑 同house IPA /lagerSteak Tartare 生牛肉他他, 上面有隻生蛋, 配黑松露多士, 好食Sauteed Mussels 有2隻味揀, 一係檸檬, 一係蕃茄, 配2塊包俾你去點埋d汁Dry Aged Black Angus Ribeye唔知係咪送錯左俾我先, 第一樣到既野食反而係牛扒. 佢d配菜都幾有心思, 係蕃茄薯蓉, 好食又唔會覺得飽. 另外仲有d羊肚菌係上面, 都幾好食. 最鍾意食佢個蒜頭, 連皮斬開一半之後燒, 唔會覺得乾身. 扒方面我覺得有一邊嘅皮有d太硬, 但入面都好juicy同夠牛味.…查看更多

星期日同屋企人黎慶祝生日，新開一個月，見幾多好評就黎試下，裝修簡潔、小清新。加100蚊可以任意自攜酒，都幾抵。呢到一定要讚下呢間小店既服務態度，店員非常友善殷勤，斯文有禮！店員仲會介紹下每日off menu既食物叫左個Dinner set for 2($628)首先出場既就係牛油果蟹肉脆餅，餅底非常脆口，蟹肉同牛油果非常合襯，加埋魚子調味，好鮮甜，黎到真係要試下。香濃牛肝菌黑松露意大利飯($168)然後，散叫左個意大利飯，食落感覺係意大利米，creamy，味道尚可。XO醬香蒜大蝦蝦千扁意粉（set）Set既意大利粉，好好味，估唔到XO醬配意粉咁好食，好夾，蝦肉爽，夠新鮮，必叫。Fika自家製雙重煙腩卡邦尼意粉（$158）卡邦尼意粉配溫泉蛋，仲有廚師即刨既mozzarella 芝士碎，好有心思。香辣墨西哥玉米片配三色醬（$68）墨西哥片配牛油果醬、忌廉、辣醬3種口味，個人比較鍾意食牛油果醬多啲，墨西哥片仲配左啲芝士，口感豐富。香濃黑松露醬配粗薯條（$58）薯條即炸熱辣辣，配黑松露醬，perfect match。炭燒美國安格斯肉眼配黑松露薯蓉（set）餐廳非常落本，刨左啲黑松露片係面，牛扒雖然比叫既偏熟，但都好軟熟，唔會韌。蔬菜都唔hea ，唔係一般既翠玉瓜，而係三色椒同小椰菜，比較小見，好味最後到甜品心太軟配雪芭，心太軟流心又暖笠笠，配埋雪芭，冰火交融，好味。整體感覺不錯，feel到店員同主廚都好有心，會解釋唔同既食物菜式。…查看更多

今日去石屋行下，見附近有間社企餐廳就支持下。叫左個set lunch，55蚊，唔貴，輕食。服務員態度好好，一見到我就問有位未，仲主動俾餐牌我，親切友善。有户外位，鐘意親親大自然或者帶寵物既朋友可以坐户外。室內環境偏工業風，裝修簡潔，有2張大枱，不過唔好expect坐得超舒服。薯餅即炸香脆，豬柳包，蛋滑流心，芝士有2款，車打芝士同mozzarella，豬柳鬆軟，好食過老麥。沙律就正正常常，冇乜特別。Latte係好靚既豬仔拉花，不過咖啡味偏深炒，唔算好多複雜既味道。見到佢地有nitro cold brew 部機，同會用酒杯裝俾你，下次有機會可以試下。…查看更多

星期六，難得黎到尖沙咀，梗係搵啲好野食下，今次就黎左牧羊少年既副線Lemna，雖然用GULU拎左飛，但都要等半個鐘先有位。建議食lunch set，抵啲，可以揀要前菜或甜品，包野飲，都係158加一。我叫左2個sets，一個要前菜，一個要甜品。前菜係柚子醋糖潰小蕃茄藜麥沙律 配蕃茄清果凍味道清新，有蕃茄果既果凍，好特別，賣相一流，好岩打卡。主菜 燒鷄瀵堡 配日曬蕃茄蛋黄醬 伴海鹽薯條薯條香脆，燒雞juicy，推薦叫呢個黎食下，好味。主菜 獨子蒜蕃茄蓉意大利辣腸肉醬扁意粉呢個意粉味道中上，唔算好突出，唔辣，份量偏少，下次未必會再叫呢個，會試下其他野。甜品 焦糖忌廉蛋糕細細舊，濃濃既焦糖味，上面係焦糖啫喱，中間有層cream，下面係蛋糕加啲焦糖脆脆。好多口感，味道偏甜。飲品 檸檬特調唔甜，酸酸地，幾開胃。飲品 藍橘子乳酸個樣好靚，又係打卡之選，不過味道冇咩特別，似汽水加乳酪，細杯。今餐都食得好飽，每人約200蚊，呢個價錢食到呢個質素，算係幾抵。…查看更多

今日一行4人到APM吃晚飯，電話book左枱，7:00pm去到仲有好多空枱，唔洗等等位，內部裝修幾靚，好有中國特色。如果5至6人，可以坐人面近窗啲圖枱，更舒服4個女仔，叫左唔係好多野食三菇扒小唐菜 $98冇咩特別，菜夠綠多甜，打左個豉油芡，味道尚可南翔小籠包 $52唔夠湯汁，個勝在皮薄，肉鮮甜。不過都係鼎泰豐好食啲雪菜肉絲炒年糕 $98食左少少先記得影相整體味道唔錯，夠味，雖然睇落好似冇乜味咁生煎包 70包即底部煎得夠脆夠香口，配上芝麻及蔥花，口感更香整體黎講環境唔錯，係有啲嘈，唔太適合傾偈，食物質素一般，但勝在位置方便，裝潢美觀:)…查看更多

家樂坊對面有間幸福堂，之前成日聽日講呢間好飲，行過見到當然試試。叫左杯黑糖珍珠奶茶（非鮮奶$28）講真，唔知係咪因爲唔係鮮奶，味道麻麻，冇乜奶味，老虎堂同喜茶都好飲過佢，唔推薦飲非鮮奶！鋪頭有人keep住煮珍珠，好靚，好特別！珍珠都煙韌。…查看更多

午餐黎左呢間食海南雞飯，70蚊1個set，唔洗加1，唔算特別抵食，但呢到既海南雞飯真係好正，久唔久就會心思思想再食海南雞飯，有3種醬汁，青色係蔥油，好香，橙紅色係泰色甜酸醬，好開胃，黑色好似係甜豉油，但好食好多，店主應該烹調過點唔同既汁，令件雞同飯有唔同既味，一碟雞飯，3種味道，正！另外仲有啲醃製蘿蔔，青瓜俾你開一開胃，貼心。薑黃飯有乾蒜片調味，但又唔會太油太濃味，健康好味:)主角當然係肥美嫩滑既海南雞，唔會太肥或太瘦仲叫左個四川麻辣口水雞，有少少辣，如果完全唔食辣既朋友唔建議食，但如果食到三哥酸辣個啲一定食到呢碟雞，對比海南雞飯較野味，個飯又淋左自家製甜豉油，好好味，個辣雞同個飯既味道超夾呢到既待應招呼得都好好，好快有反應，食物都好快上，係一間有效率既小店，會再黎！…查看更多

約左個朋友係將軍澳站覓食，2個人簡簡單單揀左呢間日本餐廳，唔係魚生壽司，而係咖哩飯，鰻魚飯，日式烏冬個啲。2個女仔唔敢叫太多野，所以叫左一個飯加餐，加多1個甜品，都夠哂飽而且閒日黎唔洗等位，首先黎既係跟餐（加$25，有湯，沙律同野飲）既沙律同麵豉湯，沙律清新。我唔鐘意麵豉湯，但呢個對比起其他餐廳好飲，一般都好淡味，但呢個落足調味，好好味吉列豬扒咖哩飯配半熟旅風蛋（$98）咖哩稀稠適中，夠濃味，吉列豬扒炸得好脆，而且唔會太肥或太瘦，唔會好似岀面啲餐廳咁，咬落去一大舊肥膏，有好幾款唔同既蛋揀，我揀左旋風蛋，整得好靚又好滑，蛋包飯咁，好好味仲好岩打卡，隻蛋整到花咁靚。緣茶紅豆班戟（$48）佢係即叫即製，所以要等30分鐘，佢係之前好流行既疏乎里班戟，好鬆軟，好厚身，佢既忌廉係綠茶味，配埋紅豆醬，味道好夾。推薦…查看更多