yutsya的个人专页

今次試晒三款期間限定包包～真係有驚有喜！第一款周打濃湯大閘蟹粉酥內餡超豐富，蟹肉多到爆，竟然仲有蟹黃添！咸咸香香真係冇得輸，以呢個價錢性價比極高。美中不足係酥皮殼略厚，同埋面頭層蜜糖有啲格格不入。第二款粒粒蘑菇忌廉湯軟包反而比想像中出色，餡料又多到滿瀉，好多蘑菇料同疑似肉粒，完全就係將成煲蘑菇忌廉湯塞咗入去。最驚喜係放咗成晚個包體都冇浸淋，口感keep得好好。可惜面頭啲黑色薄衣有少少苦味，有啲扣分。第三款日式香甜忌廉粟米撻就相對平淡，冇想像中咁香甜，餡又唔算好滑，雖然個皮係夠酥，但整體不過不失，唔算有咩驚喜。三款之中最推介都係頭兩款，真係值得一試！…查看更多

Bookmark左好耐 聽講最後做埋今個月 幾遠幾忙都要衝過黎試！無讓人失望嘅著名油封鴨配格魯耶爾芝士！一早聽聞足料食落係真！一切開 滿滿鴨肉係入面🥹加上上面隻鴨髀都唔少肉 好滿足最畫龍點睛係啲芝士！好鹹香 完全升華左件事！我係完全忍唔住地抹盡每一滴芝士 同個餅同啲鴨肉真係match到唔識講！食完已經好滿足 但都唔可以放過甜crepe！店長推薦呢個蘋果金寶配奶油醬及香草雪糕係佢哋嘅皇牌係真事！滿滿蘋果餡 餡料好香嘅肉桂味～肉桂控真係唔可以錯過！加埋啲脆脆 同冰火二重天嘅雪糕 好正我係又刮曬啲金寶脆脆抹曬上去 務求一滴不剩！店長好熱情 feel到佢好愛呢間鋪佢請我comment下like下佢哋鋪我話一定會 但太遲了幫唔到佢哋佢話有啲comment 留個記念 已經好開心收到🫡即做！見到好多人都唔捨得呢到 好多人黎食 啲Staffs超忙 😂但我呢個月都一定會再訪！…查看更多

今次去左間社交平台多人講串燒店，期待值太高所以唔算好驚喜，但絕對係高質嘅！豚肉荔枝卷 一咬落去，豚肉嘅油脂香同荔枝嘅清甜完美結合，爆汁嘅感覺超正～甜鹹冇得輸架啦，口感層次豐富，必點！焦糖菠蘿鵝肝醬多士 呢個組合簡直係邪惡嘅美味！鵝肝醬香濃幼滑，焦糖菠蘿嘅甜同微酸中和咗油膩感，多士脆卜卜鹽燒雞腿肉 🍗雞肉燒得啱啱好，外皮微脆，內裡嫩滑多汁，超滑！簡單用鹽調味已經好食麻糬豚肉卷 🍡🐖豚肉包住軟糯嘅麻糬，燒完之後麻糬帶少少焦香，咬落去煙韌得嚟又有油香，糯吱吱+鹹甜！豚肉蘆筍卷 🌱🐖蘆筍爽脆清甜，同豚肉嘅油脂crossover，食落去一啲都唔膩，仲帶住淡淡炭燒香佢$10/$20/串專區嘅款都多！以質素黎講係超值！但專區要嗌兩串起就要留意番～…查看更多

聽講銅鑼灣分店會關門大吉，抱住衝尾門嘅心態再舊重溫舊夢～嗌左2人餐+個12吋pizza，夠4個女仔食藍芝士蘋果Pizza都係個句鹹甜唔會輸，藍芝士嘅鹹香同蘋果嘅清甜撞出火花，甜鹹交織，夠曬層次。餅底薄脆，芝士微微拉絲，一啖咬落去，先係脆脆嘅餅底，跟住係濃郁嘅藍芝士，最後爆出蘋果嘅清甜，係正，不過皮薄凍得快暴龍Pizza又係芝士拉絲。餡料有辣肉腸、火腿同香腸，補番啲藍芝士蘋果冇嘅肉感，辣肉腸微辣惹味，係標準嘅肉腸pizza松露油牛肝菌火腿大通粉松露油同牛肝菌係有微微嘅香氣，火腿+芝士/奶香+大通粉，配搭唔錯，標準麥啤煮藍青口依前食過好香麥啤味，今次冇乜，但份量都夠嘅，青口都算新鮮…查看更多

三多生炸雞髀出名滑嫩多汁🤤周不時都會想去食下今日又黎回味。出餐都等得比較耐，可能因為外賣單都多，見佢已經密密做，都多人黎拎外賣。跟飯有得揀汁，揀左咖喱，係個種甜甜地、唔辣、偏日式個種。飯同汁都夠多，汁有少少薯仔，味道唔差。不過最出色都係隻髀！隻髀一出，攞上手係熱辣辣到揸唔到。一咬，肉汁多到滴出黎！同朋友一人一隻，我個隻唔辣，佢嗌小辣 。小辣係撒左辣椒粉，辣椒粉同炸髀嘅脆皮有combo，特別香脆過癮。…查看更多

藍田地鐵站附近不嬲多野食，但藍田人話我知，講好食泰菜，一定係呢間！咁犀利，要黎試下啦炸蝦餅有6粒，味道上不過不失，但勝在真係非常熱辣辣！外皮又脆，口感一流海南雞又滑又大份，冇咁多形容詞啦大家都知海南雞咩味，總之正！豬手，超 多 肉！😂好似食極食唔完咁，好入味好正，呢個大滿足，必嗌呢個除非好想點咖喱，否則唔洗試偏辣😂怕辣小心，不過鳳爪多！好過癮！正正常常炒雜菜，少少芡汁但唔多，ok咖哩軟殼蟹，超多蟹！極抵嗌！啲汁偏椰，個人好愛好少可青木瓜沙律咁多青木瓜🥹🫶🏻正總體而言，有下次！…查看更多

呢頭出名多地道韓國餐廳，同朋友黎試下呢間打卡脊骨鍋+韓燒～一場黎到，一定係嗌招牌土豆脊骨湯啦！得兩個人食唔到咁多，就冇嗌韓燒，但見隔黎枱個啲都好靚。首先坐低會上泡菜+蘿蔔，都係無限添加嘅。 電腦自己點餐好快上菜啦！個樣真係冇得輸！大大鍋！又香～一節脊骨有好多肉🤤燉得超淋好滋味！湯底講真就冇特別風味嘅😂味道係ok但唔算特色但有啲啲太辣😂食到最後好濃要過過水但幾辣都忍唔住加菜，吸曬啲汁超級過癮！平日去唔洗排隊，亦冇限時，但職員話週末就會限時。職員服務都ok，請佢哋refill泡菜同加湯加水個啲都及時。整體來講朋友聚會傾計都可以一試。…查看更多

朋友報料觀塘新開餐廳豬扒好食，即去試！鋪唔難搵，新開仲係新淨乾淨樓面姐姐熱情禮貌上菜速度正常午餐 豬扒飯+豉油汁+野飲（冷熱同價）$58，算幾抵，事關豬扒俾左1.5份真係大大份+厚身！口感唔錯嫩口又香口，豉油汁甜甜地都好夾。係熱辣辣見啱啱煎好出黎，已經夠曬吸引！唯一係個飯差少少，有啲夾生。朋友食豬扒炒公仔麵，麵炒得唔油唔錯！豬扒係另上嘅，$68 都係包野飲（冷熱同價），豬扒更大塊，係兩大塊😂仲做緊新開優惠，會再去🤭…查看更多

母親節當日，原本book嘅餐廳臨時俾唔到位我，唯有轉場，係夜晚8點半左右幸好搵到呢間啱啱有位！唔理咁多都坐入去食了成個餐其實都幾多野食，4人餐收1880+（未加一）係母親節黎講算係性價比一流架啦。但菜有啲預製feel，以前冇食過，唔知係母親節怕做唔切先咁定平時都係啦。不過味道上係ok嘅，份量上甚至食唔曬要打包添。但必須要提嘅人職員訓練需要做多啲啦，運作都幾混亂，開個茶都有5 6個唔同職員黎問過，但最後等左半個鐘都係冇。有啲菜賣曬話轉菜，來來回回2 3個唔同職員黎問幾次同一樣野。仲有啲明顯老資歷嘅職員大聲講粗口。令成個環境好亂好嘈。明明硬件上環境係坐得舒服，野食都唔係差。職員嘅質素咁樣而流失左客人嘅話就比較可惜了。…查看更多

見網上平台有推出呢間嘅放題，一向想試佢嘅龍蝦湯流心牛角包，見佢有得任食幾款牛角包，仲有任食威靈頓牛扒，已經忍唔住去試！竟然仲有一次性嘅海鮮塔，直情算係bonus添啦～一坐低唔洗講，一定係order牛角包先，龍蝦湯係真係好好食！😍湯又濃又熱辣辣，牛角包嘅皮吸曬啲精華，加上半脆半浸過、吸滿湯嘅口感，好正！蟹就失色啲，比較腥，同乾、傑少少再上個海鮮塔，講真就唔吸引嘅😂唔算新鮮，叫過過口癮嗌左兩款湯，龍蝦同磨菇，有得揀包唔包酥皮，我哋一份包一份唔包咁試。唔知係咪掛住影相打卡搞到個酥皮淋左塌左，麻麻，湯就中規中矩MVP出場！😍😍😍正！外皮少少脆香，中間豐富肝醬，舊牛扒本身就好香牛味好淋！口感同味道都一流！我忍唔住都食左四五舊😂飽曬！仲有甜品，正常發揮冇特別影了…查看更多

食過好多次佢係淘大嘅分店，今日同朋友約係九龍城呢頭，又見到佢，就入去食下飯後甜品～嗌左幾樣野！大滿足～樣樣都好味事隔多日唔係好記得係咩名我食嘅係紫薯芋泥+白玉+芋圓+仙草+椰果/咖啡凍+西米，冇記錯應該係小巨蛋仙草滑嫩，芋圓煙韌，唔錯！朋友食嘅應該係巨蜂奇緣，正常嘅刨冰，夠多料有味就唔會差另外再叫左麥提沙糯米糍，同芝麻糖不甩麥提沙糯米糍係有少少怪，因為覺得入面圓形大大粒硬脆嘅野配外面包嘅軟皮，唔太夾，好似一咬落去就頂住咁芝麻糖不甩正常發揮…查看更多

同fd係附近玩完，隨手search下附近餐廳，海濱好多好feel餐廳，揀左間泰菜啱曬一大班人食通菜同芥蘭都炒得有鑊氣，唔錯，份量中等柚子大蝦沙律，清新！但量少左啲啲豬牛雞串燒！好味啊！菠蘿炒飯，正正常常炒金邊粉，ok豬頸肉肉質口感正！香！推薦！烤餅試左原味同蒜味，唔錯！咖喱唔記得係咩肉，冇咩記憶點印度炒飯，比菠蘿炒飯好芒果沙冰，唔太似😂似奶昔多啲Over all係可以平時去聚餐食食嘅餐廳，未算性價比好高，但質素可以，唔貴，環境唔錯…查看更多

近排網上好多人大推中環嘅幾間雪糕店，咁啱係中環食完晚飯，忍唔住就去試試其中一間✨店內佈置簡約懷舊，可能已經比較夜，唔洗等/排隊。味道除左大熱嘅開心果，仲有特別啲嘅橄欖油、大米等等。問店員有咩味推薦，佢都係推呢兩款，就試試佢！店員話橄欖油嘅特色係鹹鹹甜甜，的確係！味道好有層次😍而且真係有橄欖油嘅味😂好特別，味道都好好。大米就sell顆粒感，都發揮得好好。而最驚喜嘅係佢嘅口感！黏黏嘅texture係以前未試過嘅。口感+味道 令佢層次極豐富。兩球定價$78 係進取嘅 但值得一試 成日食就唔會啦😂…查看更多

同好多觀塘街坊一樣，以前一直幫襯開舊鋪，依家冇左舊鋪，又想食番熟悉嘅味道，唯有黎新鋪回味一開始係openrice見到大家嘅食評係有少少擔心😂但都即管一試11點左右黎到都有啲人流，未到排隊但已經剩番一兩張枱，不過鋪面係比舊鋪細一截嘅。最多人講嘅識員態度問題，算不過不失，未係賓至如歸，但有基本禮貌用QR code落單，上菜熱辣辣，點心外貌覺得係企理過舊鋪嘅，都放心少少皮唔厚剛剛好！入面都好脆，食落相當唔錯！山竹牛肉同菜苗餃係以前必嗌嘅，呢到一食保持到水準！大粒抵食爆餡😋🌈😋紅棗糕就唔知係咪俾倒汗水up住個底，底個層浸淋左咁😂味OK，口感就差左少少點心拼盤幾抵食～有招牌蝦餃，蝦餃係唯一覺得差左嘅，蝦肉細粒、量少…叉燒包唔錯！正常水準最後呢個勁正！以前冇嗌過。上菜個陣有驚喜咁大塊😂煎得有啲脆口，肉同蓮藕比例啱啱好～一定要趁熱食😋食落成餐都開心！睇黎可以黎番食啦～…查看更多

係觀塘呢個食店高手如林嘅地方，平日想食個早餐真係有好多選擇，但茶記早餐就顯得有啲千篇一律，今日想揀間特別少少嘅，就去試試呢間人氣左好多年嘅老店✨慕名而來十個有九個都為左招牌蔥花蛋治！😋本來見30蚊，唔包野飲唔剩，得個蛋治，仲諗係咪有啲進取，但上到黎就覺得好抵了😂因為真係大大份同超香！啲蛋多到拎起黎食要小心翼翼會跌出黎。啲蛋好滑、滿滿蔥香，超足料！塊包好脆、落足牛油，包啲夾法有啲特別，一邊厚一邊薄，唔知老細係有咩意圖啦，但我覺得唔錯！包量唔會太多，可以突出番個蔥花蛋，但又食到包嘅脆身。但要有心理準備，好食嘅炒蛋實係油少少😂另外叫左個豬扒雙太陽蛋早餐，配牛油多士同熱飲。太陽蛋煎得啱啱好係基本啦，豬扒我呢到影得唔清楚，但其實係超多！😂有3塊大1塊仔細。上到黎啱啱煎起仲有啲油泡泡冒出黎，又係好邪惡但好正！呢到仲有好多招牌菜飯同麵，我已經諗緊幾時黎再試其他野食😋…查看更多