siulai88888的个人专页

尖沙咀新店比起佐敦店既裝修同服務真係差好遠，尖沙咀起碼坐得舒服啲，光猛，侍應們個個都都好attentive 又冇圍埋一齊大家聲講是非！相同價錢一定係去尖沙咀店。講返野食，黑松露燒鹅真係鎮店之寶，放底抬面已經聞到好香，食落又真係好香好肥美。伊比利亞义燒亦都不錯！金錢雞唔係度度有得食，呢度又整得幾好架。其他水蟹粥，豉油皇炒麵配余坤益，白賣（白色燒賫），义燒餐包都不過不失。一家人午餐舒舒服服坐低，食物好，環境正常，絕對可以回頭幫襯…查看更多

今日有啲凍凍地，諗起去方太小鍋米線度食米線同埋飲佢既花膠湯。今次已經係第二次去，上次試過炸醬撈米線，覺得可以encore 所以再次幫襯。小店，全鋪頭只有三個人，而當中只係得一個人煮麵，所以都預咗要俾d時間。我碗花膠雞湯准山麵大約係15分鐘之後準備好，滿心期待，但係好可惜碗麵完全唔熱，上枱d湯真係唔熱。食到中間已經凍哂。其實呢間野用料係好有誠意，主打特式湯底，但係如果問題出係湯唔熱既問題上，就有點失策了！…查看更多

屋企長輩生日，一直都未試過國金軒，見到佢多年米芝蓮又book到位，咁就試吓啦。週日餐廳午餐分兩個時段，我哋係食尾場1pm1pm左右安排座位並且叫茶，一壺鐵觀音加一壺滾水，相信一般普通茶樓都可以handle到吧？大約20 分鐘，套餐既頭盤已經放係預備桌上，但係水都冇飲過一啖。多次催促壺茶先至到，壼水就梗係冇影啦。但係席上有人唔飲茶，又要再催多次，心知不妙。套餐頭盤，跟住上桌既3件點心，不差但很難理解點解可以攞米芝蓮。之後再上既國金老火湯，應該頭輪午餐都有很多食客，席上大家出嚟食咗咁多年野，都以「關東煮」來形容這個湯。印象深刻既係蒜子菜苗，大家看圖感受，這個預先把白菜剪碎的方法，我以為自己去國金軒食剩菜添！由於長輩生日，預留5件壽桃包並得到WhatsApp 確認。上桌時只有3件，追問之下話廚房蒸漏咗。如果一些很注重這些禮節的長輩，真係有點兒那個吧！成餐飯都令人大開眼界！餐飲業有時不要問為什麼港人不熱衷留港消費，付出的與收到的不成正比，大家都消費者，點樣撐你？…查看更多

多次回訪Morton’s of Chicago，最近一次係疫情其間二人一桌的時候。今日約埋屋企人想去扒房食扒，Henry 其實都係考慮之列，不過心思思又想去飲佢個洋蔥湯，所以就去左Morton’s.Lunch set 叫價$698+10%，首先上嘅係洋蔥湯。今次評價麻麻地，有點咸同埋有點太杰，其實唔係幾飲到d湯，希望可以改善一下。主菜大家都叫左6 oz Filet Mignon, 配洋蔥同藍芝士牛油汁。去得扒房就冇諗過要食其他選擇例如三文魚或者雞扒什麼的了。牛扒叫左medium, 十分之好味，有牛味而且個洋蔥藍芝士牛油汁很配合，讚！為咗食牛扒，可以嚟呢度。Side dishes 三個蔬菜都很嫩很新鮮。Creamy Spinach 就係邪惡啦。唔鐘意食甜野嘅我，覺得個cheese cake 好甜。屋企人話cream brûlée 好味不太甜。…查看更多

本身一直都鐘意食墨西哥野，係香港呢門菜式絕對係罕有，好多餐廳求其整d野出嚟呃下就當係，變成什麼「港式墨西哥餐」就真係得啖笑！Nachos 不嬲都係墨西哥菜既主角，而伴隨既Salsa 醬，牛油果醬同sour cream, 少一樣都唔對辦！以前一直幫襯元朗一間有點年資既西餐廳，最近d醬縮哂水，Salsa 醬好少咁散落面，牛油果同sour cream 俾丁丁咁少，如果冇左呢3種醬，我不如買包粟米片自己乾啃啦！講返Taco Friday, 醬料足夠，好肯落重手，食Nachos係要食到成手都有醬架嘛！呢個非常之重要！加分！唯一缺點就係正宗應該要焗一焗，不過由於佢做快餐，呢個位我覺得都可以接受喎。Quesadillas 都正宗，辣肉醬係真墨西哥味。係香港有呢個味道，抵讚。老闆一個人乜都做晒重要有禮貌，小店十分有誠意，會再次幫襯。加油！…查看更多

話說起碼廿年前已經第一次幫襯呢間炉端燒，當年年紀小，父母帶着我嚟見識，每次都有廚師用條船槃傳送食品，覺得好好玩，細個就真係唔明食物嘅品質同味道。呢廿年來斷斷續續都有嚟食，好記得由好好食（及好好玩），相樸乎午餐變成又柴皮又漏單, 最慘係漏咗單個師傅重要串串嘴，見證當年香港地巴之閉既年代。之後就梗係唔係點幫襯，對上一次係疫情前，記憶之中都係冇乜特別。今日再次幫襯，全因見到廣告話online booking 有八折，然後送蛋糕同加送一杯野飲。好啦，咁我又反嚟啦。折後500蚊鬆啲一位既相撲手午餐，第一件事就係食銀鱈魚，呢個就永遠冇得輸，encore 左兩次，真心無得頂，又嫩又滑。其他例如鮑魚仔，大蝦，帶子，牛扒，羊架，各式瓜菜，魚乾，魚生，老實一般自助餐貨式，可以接受既。然後送既生日蛋糕，甜品sherbet, 2杯飲品，呢個價錢係可以嘅。一家人weekend 嚟個另類放題，不錯吧！…查看更多

行過附近約咗整野又未夠鐘，先食左個early dinner先。睇舖面招牌已經知道係舊式雲吞麵，咁一於叫碗$36 細蓉加$10支裝zero 。雲吞真係可以叫做皮薄餡靚，d蝦新鮮又彈牙，其實叔叔係門口都一直有包雲吞，一定新鮮啦。老實冇乜驚天地 泣鬼神，正常舊式雲吞麵，大地魚湯再加辣油，簡單又滿足。姐姐都係好人，只係舊人類唔係那種口甜舌滑，但係落單一步到位幾爽吖！…查看更多

權八重響銅鑼灣舊鋪既時候已經食過好多次，味道有保證不過舊啦同埋冇景觀，直至搬去銅鑼灣新鋪，都係得普通街景，所以就冇乜特別要寫食評。當佢係九龍都開鋪選址北京道一號，一直都好想幫襯，有時困係繁忙嘅工作見得太多人同建築物，真係好想食餐飯可以有view。已經食過午晚餐各兩次，午餐主要食lunch set, 唔需要十分formal 既話，同朋友business partner casual 嚟食會好適合。 好，今次係寫前兩晚既晚餐，首先無敵香港夜景啦，嘢食方面，之前被介紹點過一道野菜沙律伴大閘蟹膏醬作為appetizer, 今次encore, 其實如果沙律菜撈d沙律汁，真係唔洗點講，呢個前菜係一盤好新穌既瓜菜蕃茄，切食bite size, 然後食既時候拌入蟹膏嚟食，本身唔點食菜唔點食蟹膏既人，都會comment 話呢個食法真係幾好味！卷物正常發揮，串燒亦都不錯，最後天氣凍，所以加左個sukiyaki 和牛，好味牛肉又新鮮。整體來講係一個好experience, 會再encore !…查看更多

呢餐幾好味，值得寫一寫。首先講個醬油蟹，$270鮮甜多膏，立刻要encore另一隻。之後點左牛肋骨大骨同小骨各一碟，牛肉好淋好有牛味，反而唔見所謂既什麼證書，不過好食已經唔care, 配上芝麻葉同生菜，加埋燒酒真係絕配！豬肋骨都好味，但係大家都覺得牛好食d。之後炒粉絲，略爲甜左少少但係都炒得幾好。牛肋骨湯，係用清湯去炆燉牛肋骨，肉香四射，千祈唔好以為要用韓式醬炆先好食，咁樣清湯炆燉，原汁原味好正喎。然後再叫左肉眼扒就正常，然後再叫五花肉作結，食韓燒五花必叫啦，呢兩樣就不過不失啦。前菜小食醬汁任點，除咗個甜辣蟹只可以加一次。剛開業個多月，服務有可以改善既地方例如要換碟加水。整體來講係好正可以encore, 飯後去洗手間見到全部都係韓國女仕，本地韓國人都食，唔會差吧！…查看更多

朋友介紹蓮香樓背脊位置有間過江龍，一般聽過江龍一定以為係什麼西日韓餐廳，竟然係中菜，嚟自英國🇬🇧沒有寄望之下，每道菜都好有水準！首先選了肴肉同黃金豆腐粒作為前菜，不錯。之後半隻鴨上枱，由於起哂骨所以啖啖肉，差不多每枱必點，皮脆肉嫩，配合秘製醬汁，又係一口接一口既。再嚟係意大利黑醋一字骨，排骨炸至酥脆，加上黑醋汁濃厚重口味，忍唔住食咗3件！之後既黑松露蝦餃炒蛋，黑松露不欺場，炒蛋又嫩，蝦仁大隻又爽口！惹味四季豆炒嫩牛肉，牛肉真係嫩，四季豆好味，全碟清！可惜已經飽到上心口，如果唔係一定會試吓吉士糕。有老店情懷但係服務十分到位，沒有傳統店那種傲慢反而十分親切！中菜都有plating, 事實係真心好味，近期大推之中菜廳。…查看更多

晏左少少出去食lunch, 見到唔洗等位就俾個機會試下啦。叫左個中午限定套餐，有一款麵食，一款6件餃子（+$6 轉煎餃）同一杯野飲。麵食當中揀左雪菜肉絲，碗麵一嚟到就見到好厚既一層油，即係如果放凍左，面頭係會有一層白色油嗰隻。再食一啖，好咸，再者，個麵底有兩「主」都拿埋一舊，好似曾經煮過再整熱咁。成個麵真係唔係好合格。煎餃，曾經食過一d好出名小店既作品，呢間真係普通得好普通。…查看更多

由於要係附近整頭髮，所以搵一間快食又頂肚既。去得熟食中心，就係預咗係食個風味啦。豬扒麵同凍檸茶走甜，豬扒都入咪既，今日亦都唔太乾。凍檸茶就正常茶底。不過而家大排檔都要$66, 絕對唔會平過茶餐廳架。…查看更多

今晚朋友請食飯，知道呢間餐廳係觀塘有分店，能夠再開一間係中環，應該有咁上下實力。朋友點左五指毛桃燉湯，足料又夠味，十分滿意。然後係蓮藕蜜椒骨，藕片脆，個骨又好入味。之後係准山年糕泡蜆，係湯汁上嘅，正常發揮。再嚟係啫啫生菜煲，冇左連鎖酒家那樣的大浸蝦醬同滋滋聲，佢又有份高檔路線版既美味，唔會成浸味但係入面加左肉碎同個汁令到個菜好惹味。有時反樸歸真，一碟生菜反而更加見到廚師既功力。最後既桃膠豆腐花，唔會太甜亦有內涵。另外呢度嘅中菜上菜全部都有plating, 未食已經賞心悅目了。…查看更多

知道有這家人龍麻糬波波店大約半年，當時途經中上環附近，大約兩三點左右，門口大概有20-30人排隊，重要唔係好郁既，所以放棄左啦。尋晚大約七點，見到冇人所以立刻入去啦，被告知只係剩返肉鬆味，其實首選唔會係肉鬆，不過唔想又食唔到，咁就買一包試吓。 有驚喜喎，首先佢哋嘅麻糬係整得好好，好煙韌又軟熟，配上d肉鬆有些少既咸香，係會用好味嚟形容。行過經過都值得去買嚟食下。希望下次可以唔使排長龍都可以買到其他味道啦…查看更多

今日試咗呢間餐廳，中午唔算好多人。叫左set lunch 先嚟左個餐湯係青瓜忌簾湯，正常發揮同埋夠熱。然後主菜係慢煮豬架，水準不錯，收$260 架，出面煎得啱啱好，慢煮既關係入面d肉依然好juicy, 唔會乾爭爭。男仕有可能唔夠飽，女仔就ok, 餐後有餐茶。作為一餐business lunch, 食物、裝修、服務都可以喎。…查看更多