Esthevel的个人专页

灣仔開業多年既燒雞名店，一直都想試佢好耐，而家紅磡開分店，終於有機會試下。招牌名物燒雞半隻上，份量頗大。 本來想用刀叉，但都係放棄要落手。 燒雞熱辣辣，沿雞髀位撕開，肉汁洶湧地流出。 呢樣嘢真係要成隻落手先至可以感受到，用刀叉或者事先切開細細件就感受唔到啦。皮燒得十分香脆，因為係燒（烤？）唔係炸，仍然保持薄薄既一片，而唔會吸收油份同變厚變硬。 雞肉很嫩，又由於有豐富既肉汁，就算雞胸肉等等較為厚肉同瘦即位，都唔會乾硬。再試埋炸豬手，豬手份量超級大，一個人唔容易食晒。 整體上皮都算脆，但有部分位會炸得唔而較淋。 有趣係佢既調味係咖哩味，咖哩味幾香但食得多會有啲膩。另外，可能開咗唔係好耐既關係，雖然服務態度還好，但係落單、揀位、同取餐既流程仍有磨合同改善空間。…查看更多

紅磡廣場成個商場本身都好有歷史感，而呢間舊式快餐店就位處商場地面落一層，一個好靜焗既位。朝早嚟到，成間鋪好似處於半睡半醒狀態，安靜，休閒。 早餐主要都係正常大路選擇，比較少見係麥皮餐。 麥皮質感同味道都頗濃，腸、蛋、多士、奶茶等就正常水準。晏晝時間突然變得非常多人，直接放棄，擇日重賽。下午茶時間又回復返寧靜，終於可以試佢既招牌炸雞髀。 雞髀外皮炸得非常香脆，十分香口。 肉質尚算嫩，但又未至於有肉汁流出嚟。 調味亦適中，唔會太鹹。可能而家物資太豐富，要叫得做巨型雞髀同皮脆肉嫩既門檻都越嚟越高。 呢度既炸雞髀，以往日既標準嚟講，應該都算幾大隻同嫩口。 咁而家呢講，總之食得開心就好啦。…查看更多

十八座越開越多分店，但唔知點解，呢間應該都唔係好新啫，但竟然一個評論都冇。 食物保持一貫水準。 火鴨翅質感頗濃，但又唔會變左好似粉漿咁。 配料豐富，亦有火鴨淆過既鮮味。 配合埋鴨脾，係非常之好既配搭。自家製菜脯一向都出名，加落火鴨翅或者狗仔粉，成件事情昇華左。其他小食，例如魚皮餃、炸丸等等都相當唔錯。近來，香港食肆無以前咁瘋狂地多人。 可以慢慢坐，低慢慢食。 店員亦可以合理時間地製作食物，唔使不停畀人催，食物水平總算回復返正常。 有時路過口痕，可以支持下。…查看更多

大帽山，應該都可以算係香港其中一個郊遊熱點。 天氣好時可以上山睇日出，或者雲海，又或者霧。 去士多幫襯下豆花、小食。 然後再飲個早茶。所有野都係自助，搵位、開茶、揀點心，全部自己搞掂。 再配合呢度既鄉效環境，成件事好有效遊氣氛。食物方面，都係傳統飲茶點心為主。 蝦餃大大粒，入要蝦既份量都唔少。 燒賣、飽點等等，都係大大件，睇見都幾有視覺滿足感。 芝麻卷、大包等等，而家唔係好多地方有啦。 另外，西洋菜都好值得試。整體上，食物水平算中上，但氣氛就真係一流。 郊遊飲個茶，簡簡單單幾快樂。…查看更多

彩虹邨作為多年既老屋村，入面隱藏好多有歷史既老店。門面、招牌、裝修、餐牌，都係年代既見證。 簡單叫個下午茶餐，奶油脆豬烘得相當香脆，上面滿滿既奶油，入口香甜鬆脆。炸鷄髀外皮炸得香脆，雞髀肉生熟程度亦適中，熟但冇炸到乾晒。薯條係好傳統既波浪型。 茶走茶味夠濃，亦頗香滑。總括嚟講，食物水平係合乎預期地滿意既。 或者未算係隱世美食，但起碼都坐得舒服，食得開心。 相比起倒模一色一樣既連鎖快餐店，呢度更加有人既感覺。…查看更多

屹立渡船角多年既老字號越南法包。法包之外，其實仲有蒜蓉包、春捲等等。 試過其實都幾好食既。 不過，要數呢度最出名，始終都係佢既招牌法包法包有大同細，如果食得晒，又或者兩個人分，大法包視覺效果豐富好多更開心。 法包使用前先烘脆，外皮形成一層一咬即碎外殼。 法包入面包住豐富既餡料，有腩肉、扎肉、肝醬、醃蘿蔔等等。 口感相當豐富。 醃蘿蔔清爽帶微辣，剛剛好平衡肉類同肝醬嘅濃郁。多年老店有多年老店既限制，環境設施用咗咁多年始終會較舊，但懂得欣賞自然會搵到好野食。…查看更多

土瓜灣好多多年歷史老店，有心機行會發現好多有趣事物。 呢間士多，鋪面細細，主賣椰汁。 椰汁即叫即打。 因為連冰一齊打，入口十分冰凍，夏天飲消暑一流。 椰汁口感頗濃厚，椰子味亦算重。 建議趁最冰涼既時候，飲晒佢就最好啦。 感覺放耐咗，溫度回升，慢慢奶既感覺會變得越嚟越強。 同時，甜既感覺亦會越嚟越高。 始終，溫度係會影響人對味道既感覺。 就好似雪糕、汽水等等，放到變室溫都會變成入唔到口既糖漿。 呢支椰汁都係，趁最冰涼既時候飲就好啦。…查看更多

土瓜灣小街既一間食店，平日做一啲非常之佬既碟頭飯，但係夜晚就會變身手工粵菜半私房菜。 點解話係半私房菜，因為佢最好食既嘢，即係主打既手工粤菜，大部分都係要預訂既。 應該而家仲做埋個套餐，大部分主打野都已經喺入面，畀之前逐樣散叫抵食咗。爵士燉湯，相傳係鄧肇堅爵士既配方。 用螺頭、豬展、雞腳等等，同埋蜜瓜燉成。 通常個個第一次聽到都會問，蜜瓜？？ 係，真係蜜瓜。 燉出嚟既湯，走清甜路線，而唔係一般海鮮湯既暴力甜。 每人有兩碗，仲有一大碟湯料。 未試過，好值得試下。鎮店芝麻雞，個名已經話畀你聽，如果嚟到只識一樣嘢，咁一定就係佢。 芝麻雞炸到皮脆肉嫩。 上面滿滿地鋪滿咗芝麻，令到食落更加香口。雞本身已經好夠芝麻味，而仲跟咗一碟芝麻醬。 建議可以先試咗原味，然之後再試下點少量芝麻醬。蝦多士，呢樣嘢同一個名但係間間舖既做法同造型都會唔同。 而呢度既，係滿滿既蝦餃包住蝦尾。 造型有啲似炸蟹鉗咁樣。 蝦膠十分彈牙，而外表亦炸得好脆。西蘭花炒龍躉，龍躉份量都唔少，魚肉有咬口之餘夠嫩滑。家鄉蓮藕餅，藕餅表面煎到好香，入面食到爽口既蓮藕粒，仲有濃濃既臘味味道。錦鹵雲吞，雲吞皮炸到好脆，錦鹵汁入面有蝦、豬潤、菠蘿青椒等等，十分足料。蜜椒脆鱔，鱔肉嫩滑，去骨，食落淡淡肉。外表由一層甜甜既焦糖包住。 食落口感，同一般蒸鱔完全係兩回事。魚腸蒸蛋，有大中細可以揀，但其實細已經好大砵。 入面唔係有魚腸既蒸蛋，而係滿滿既魚腸，再加入蒸蛋去填滿魚腸之既嘅空隙。 臘味炒飯，飯粒粒分明，入面有各種臘味。 其實去到呢個階段，基本上已經飽咗，但係都成碟清晒。家鄉糯米糍，有紅豆、花生、芝麻三隻味，餵呢個咁豐富既一餐作結尾。…查看更多

其實咩先至係香港特色食物呢？ 適應力、融合、取長捨短等等全部都係？呢度個餐牌睇落相當豐富。 全日早餐、常餐、肉餅、口水鷄、焗飯、煲仔，中西日五湖四海都有，望落去都係吸引既。 可能咁係就係香港精神？煎肉餅幾厚，表面煎到好香。 肉質保持到彈性，咬落好有質感。 加上瑤柱、櫻花蝦，十分惹味。 再加埋流心煎蛋，成件事好豐富。 而飯亦都基本上粒粒分明。 跟餐既翠玉瓜同雲耳，就中和返油膩感。 另外，仲有一杯野，一飲之下竟然係湯。 仲有多少火喉煲過既湯，而唔係隨手一勺既例水，算係少少驚喜。牛骨源湯沙爹牛柳湯麵，湯底真係有少少骨膠感覺。 沙爹牛柳份量足，而且仲係大大片厚切。 黑松露炒蛋亦都幾滑。質素大致上滿意，有機會要試埋焗飯同煲仔。…查看更多

希雲道一帶，由車房、回收舖，慢慢轉形成銅鑼灣食街。 呢間位於街尾最督督位置，就有相同出色既手打漢堡。漢堡用既包會先烘過。 未至於脆，但都烘得幾香。 漢堡扒攪碎程度適中，保持有相當質感，仍可以可以食到一絲絲肉既紋理。 輕輕壓平，有相當厚度。 煎出嚟一方面保留到肉汁，另一方面可以做到，入面仍然保持輕微半生熟既狀態，令口感更鮮嫩。其他配料，如煙肉、煎蛋（同流心蛋漿）令味道更加豐富濃郁。 生菜、洋蔥、蕃茄等就令口感清新，中和油膩感。 驟眼睇好似唔係好大個，但係食落已經好滿足。 整體上，係一個口感同味道都好豐富既爆汁漢堡。黑啤洋蔥圈，如名字所示，黑啤外皮既存在感十分高。 香脆而滿有質感，充滿黑啤既麥香。 幾乎可以講話外皮先至係主角，入面既洋蔥（當然都好新鮮多汁）變成只係完成埋件事既必要一員。總括嚟講，食物水準相當高，係好值得推介既漢堡同小食店。…查看更多

彩虹邨宣佈重建，加上呢度被吹捧爆紅，實在係一位難求。 除非組團，如果唔係真係好難 book，天荒地老都未必訂到枱。 難得有機會嚟，就好好享用一下傳統手工菜，過一個歡聚之夜。七彩蝦片，炸得鬆脆，幾開心既前菜。杏汁白肺湯，十分足料，肺洗得潔白爽口，湯十分清甜。蠔豉生菜包，蠔豉餡料既濃味，配埋生菜清爽，啱啱好互相配合，濃而不膩。錦鹵雲吞，雲吞皮炸到好香口，汁料酸酸甜甜幾開胃，入面有豐富既青紅椒、肉、豬潤等等配料。酥炸蟹鉗，表面香脆，入面厚實好有質感同彈性。小炒王，韭菜、西芹、鮮魷、腰果等等炒得夠晒鑊氣。紅燒斑尾，大大條，魚肉夠滑，表皮泡過油好香口。花雕蛋白蒸海蝦，蛋白有好濃既花雕味。 海蝦新鮮，肉質厚實入晒味。豉汁盤龍鱔，蒸得啱啱好，鱔肉鮮嫩滑口。金黃蒜香雞，皮脆肉嫩，加埋蒜更加香口。窩蛋免治牛肉飯，賣相晶瑩通透。馬拉糕，夠鬆化，食到蔗糖味而又甜度適中。另外，酒樓週圍既陳設，都係時代既見證。 喺佢消失之前，好值得嚟下。…查看更多

由外觀嚟睇，呢間都應該開左好多年。 而且，今時今日傳統粥鋪已經越嚟越少啦。 於是乎即管一試。炸兩既腸粉，滑度其實係合格既。 只可惜，可能天氣太熱食粥人少，去貨同再製作既流轉速度太慢。 入面油炸鬼已淋左。試下生滾豬潤粥。 粥無想像中既超級熱。 粥既綿密程度亦都好一般。 以一般粥既標準嚟講係略稀。 如果以生滾粥既標準的話，咁 …… 都係當佢普通粥算啦。豬潤鮮味一般，又唔係話完全冇，但又唔係好鮮味咁啦。 整體上，食物水平太致上一般，唔算特別出色，又未至於十分差。 路過而又真係好想食粥的話，都可以既。…查看更多

入到嚟屯門呢個位，出名既固然有大名鼎鼎既龍床盤，原來靜靜地喺側邊仲有間都幾出色既台灣菜。牛三寶麵，湯底大致上走中庸路線。 調味唔錯，有多少牛味同香料味。 未算超級濃，但都夠味。 牛三寶份量相當豐富。 牛𦟌煮得相當淋，而且好厚好大件。 牛筋煙韌，好有彈性。 牛肚亦夠淋，夠入味。胡麻醬撈麵，清清地得嚟帶少少辣味，熱點食幾開胃。 滿滿鋪滿雞肉、青瓜等等配料，味道唔算好突出，不過都食得開心。水果茶又係大大杯，上面幾多生果，睇見到都開心。…查看更多

位處旺角邊陲位置，不過對於揸車既人嚟講，梭椏道都應該好熟悉。鋪面唔算大，不過佈置都幾有心思。 唔怕熱，仲可以坐戶外。今次試打漢堡。 一上枱，見，量都幾大，視覺上滿足係有既。 漢堡扒都算厚，味道中規中舉，唔算煎得特別香，亦唔算特別多肉汁。 加埋大大片熱溶既芝士，滿足感都係有既，質素嚟講算中上水平啦。另外，有多款意粉選擇。 唔算特別平，不過勝在用料新鮮，蟹肉意粉等都相當鮮味。 意粉軟硬適中，有少少咬口。 相比之下，其實會更推介意粉。加咗個雞翼做小食，表面香脆，內𥚃肉嫩，唔錯。跟餐要杯凍 americano，味道清爽。整體嚟講，舒舒服服坐低食個意粉，飲杯咖啡，都係唔錯既地方。…查看更多

土瓜灣人必食小食店，同區開分店。正如一眾高手所講，最大既對手就係自己。 分店最大既標杆就係本店。驟眼望落去，本店主打食品好似都有齊，而且仲有幾樣分店限定。 至於營業時間，好似比本店開早少少。簡簡單單，試試韭菜餅，同炸豆卜。 韭菜餅外皮煎得好香脆，好乾身。 餡料仍然保持濕潤。 韭菜同肉亦都好平衡，係雙主角，而唔係主角配角嘅關係。至於炸豆卜，依舊香脆。 不過係淨炸豆卜，而唔係豆卜釀魚肉，但依然好食。整體嚟講，都應該算有本店既八、九成水準。 如果想行少幾個街口，都可以考慮。…查看更多