A姐M佬's Profile

幸福嘅一餐，當然就係同自己喜歡嘅人或者屋企人一齊食飯，人多去叫餸食飯就最啱，每人揀個小菜，枱面即刻變得豐富又有氣氛。位於美孚嘅京都薈，菜式選擇多，而且份量十足，碟碟都係送飯神器，傾住偈送飯就更惹味，真係會食到忍唔住要加多碗靚仔呀！南非鮑魚鮑魚贏嘅就係口感！用上果皮同薑絲稍為調味，將鮮味帶出，加上非常新鮮，所以口感彈牙之餘，又有一份鮑魚獨有嘅鮮甜味。枝竹火腩炆斑頭腩煲用汁煮過嘅火腩，雖然無咗嗰種脆口感，但嗍晒味嘅火腩，同樣惹味，霎時成為男人嘅浪漫。至於炆煮過嘅斑腩，魚皮保持香脆，魚肉入味又軟腍，雙腩同煲，呢個男人嘅浪漫就更昇華啦！明爐燒鵝王燒鵝嘅外皮晶瑩剔透，鵝皮燒得夠乾身又香脆，鵝油豐盈，肉香而不膩，沾上微酸嘅鵝醬，更加惹味。大澳蝦乾唐生菜煲恰到好處嘅火候令唐生菜入口爽甜，混合甜中帶鹹味嘅大澳蝦乾，用上砂煲爆炒過之後，火侯十足，色香味更上一層樓。…Read More

近年工廈活化，多咗好多初創、餐廳，甚至連鎖商店加盟，每次都會令你有意外驚喜。今次嘅驚喜嚟到荔枝角嘅卵化生活。就咁聽「卵化生活」呢個名，確實連繫唔到我哋會食得咁chill！由黑松露到法國青口同油封鴨，讓我在工廈遇見了充滿驚喜嘅法國大餐。黑松露泡沫蘑菇湯呢碗湯嘅賣相非常特別，有好多泡泡，好得意呢！而湯頭係將不同種類嘅蘑菇打成，令菇香味更多層次，而且特別濃郁。另外，加上黑松露更令蘑菇湯提升至另一層次。法國青口青口每日由法國新鮮運到，加上廚師用上香濃的忌廉湯底烹調，令青口更鮮甜。另外，加入蘑菇及蘆筍作點綴，簡單的烹調已經能突出青口自身嘅鮮味。法式油封鴨飯天氣涼涼哋又點少得煲仔飯呢！孵化生活嘅煲仔飯用上微微煎香嘅法式油封鴨髀，煮嘅過程令飯底㐬滿鴨油嘅香味，加上脆口嘅菜甫，係一個非常特別嘅法式煲仔飯！…Read More

講泰文嘅店員、播住泰國節目嘅電視、泰國風嘅裝修氛圍，基本啦，最緊要啲嘢好食！位於九龍城嘅泰式食泰國菜館以小店經營，泰國籍大廚入住經驗豐富，曾經喺其他泰菜餐廳工作，味道正宗之餘，仲了解香港人口味，真係「阿萊」呀！九龍城泰式食泰國菜館仲要開到凌晨兩點，啱晒一班夜貓喺九龍城慢慢enjoy。燒魷魚輕輕燒過嘅燒魷魚香味撲鼻，魷魚邊燒至微脆，令口感彈牙之中帶有微脆同焦香。沾上泰式酸辣汁，酸酸哋嘅味道更開胃，醒胃就啱曬做前菜！明爐冬蔭公烏頭烏頭魚肉軟嫩，完全無泥味，加上冬蔭公湯之後，魚肉吸收湯汁令魚肉嘅味道層次提升，非常惹味；至於魚肉嘅鮮香味亦融入冬陰功湯內，令湯底更香濃，相輔相成，真係大滿足！泰式燒雞披著金黃色外皮嘅燒雞，真係好吸引呢！薄薄嘅雞皮燒煮過程中滲出雞油，令熱辣辣嘅雞肉食落幼嫩而多汁，另外附上嘅甜酸醬則恰好可以中和食得多雞皮之後嘅油膩感，亦可以提升味道。…Read More

日本百年玉子燒名店：松露玉子燒，正式登陸香港，而首間海外分店就設於沙田！呢間創業逾百年嘅松露玉子燒喺東京築地場外市場均大受歡迎，全因以獨特嘅人手煎製技術和嚴選食材聞名，令玉子燒口感細膩、甜香滿溢。而香港築地松露嘅唔少食材都由日本空運直送，梗係要即刻嚟試試！近江牛肉丼配溫泉蛋、大根煮貴為三大和牛之一嘅近江牛絕對係呢個丼飯嘅重頭戲！築地松露嘅近江牛入口即溶，脂肪甘甜，配上牛肉嘅最佳拍檔：生雞蛋，令牛肉肉質更顯嫩香。配上一口軟綿綿嘅珍珠米白飯，幸福感直線上升。而大根煮亦煮得非常入味軟腍，高湯嘅味道完全滲入蘿蔔嘅深處，一咬落口湯汁亦都一湧而出，非常驚喜。鰻魚玉子丼、吉列廣島蠔鰻魚肉質軟腍，加上香濃嘅鰻魚汁，絕對係冇得輸！不過，呢個鰻魚飯嘅重點當然唔只係鰻魚，而係側邊嘅玉子燒。作為築地百年老店，其招牌玉子燒絕對令人一試難忘，因為每一件玉子燒都係人手煎製。黃金色嘅玉子燒口感柔嫩，加上明太子令蛋香更加突出；而吉列廣島蠔亦絕不遜色，香酥嘅外皮加上甜美嘅蠔肉，絕對係完美嘅配合。…Read More

鍾意捐窿捐罅搵食，今日就去到尖沙咀嘅東京天井食堂！餐廳店面唔大，小小嘅廚房由一位大叔店主主理，大部份都係即叫即做，細心用心烹調，絕對能夠體現大叔的愛呢；加上東京天井食堂有種深宵食堂嘅風格，真係好日本呀！至於東京天井食堂嘅出品同樣驚喜，首推當然係人氣嘅鰻魚飯啦！黯然銷魚飯當你以為黯然燒魂只可以配叉燒咁單調，東京天井食堂就用上鰻魚！肥美肉厚嘅鰻魚上面沾滿鰻魚汁，再撈勻蔥花同太陽蛋嘅蛋黃汁，食到鰻魚汁嘅甘甜之外仲食到濃郁蛋味，係簡單而豐富嘅味道。牛肉壽喜燒配和式定食香濃嘅壽喜燒真係無得輸，湯底微甜，夠晒開胃。至於牛肉嘅生熟程度啱啱好，加上有生雞蛋嘅加持，令肉質更嫩滑；而且份量十足，非常抵食。…Read More

旺角有唔少特色嘅街道，鍾意尋寶嘅話唔定會有驚喜呢！至於嚟到花園街，我哋嘅尋寶唔係市集上嘅百貨或者地攤，反而係街道兩旁嘅餐廳。喺人多熱鬧嘅花園街，有一間文青木調嘅餐廳，形成強烈嘅對比，令賞島咖啡屋成為喧鬧嘅淨土。慢煮雞胸柚子汁沙律以慢煮製作嘅雞胸肉，肉質完全唔亼鞋颯颯，入口軟腍，酸酸甜甜嘅柚子汁，更令雞胸肉帶有清爽嘅感覺。海鮮龍蝦湯龍蝦湯嘅龍蝦鮮甜味香濃，仲有啖啖龍蝦肉同原隻蜆肉，味道鮮甜突出，層次豐富。美國安格斯肉眼肥美肉厚嘅美國安格斯肉眼，五成熟就最啱我心水。肉質Juicy，牛肉味濃厚，非常惹味。至於配菜嘅大啡菇索晒肉汁，加上香濃嘅菇菌味，好好味呢！蒜蓉花椒蜆肉意大利麵新鮮嘅蜆肉作為主角，除咗本身嘅甜味之外，恰到好處嘅爆炒令到蜆肉本身保持到海鮮鮮味之外，更傳播到意大利麵之中。但最驚喜嘅係用上花椒作為調味，花椒陣陣辛辣香味，配搭創意。…Read More

喺歐洲嘅藝術館睇展覽，仲可以品嚐美食，係唔少人嘅歐遊必去嘅活動之一。但原來近近哋，喺尖沙咀嘅B&B Oyster Steakhouse都可以滿足到你嘅要求。前身為畫廊嘅B&B Oyster Steakhouse，牆身除咗掛滿充滿藝術感嘅畫作，更有駐場歌手演唱。加上精緻嘅美食，成就一場視覺、聽覺、味覺、嗅覺嘅盛宴。生蠔頭盤就揀咗嚟自愛爾蘭同法國嘅生蠔！雖然產地不同，但兩者都非常肥美鮮甜，而且蠔身自帶淡淡嘅海水味，非常滿足。海鮮意大利飯意大利飯軟硬適中，粒粒都飽滿住香氣四溢嘅龍蝦濃湯，加上拉絲芝士嘅加持，味道非常香濃。至於配料用上大量新鮮嘅海鮮：蝦、龍蝦、青口、蜆等等，令海鮮意大利飯更具層次。美國厚切極黑豬鞍扒厚實Juicy嘅豬鞍扒配上微微帶甜嘅蜜糖芥末醬，增加味道層次。而薯條炸到脆卜卜，加上新鮮爽脆嘅沙律菜，加添呢道菜嘅顏色，亦減低油膩感。…Read More

位於中環嘅御珍味，係唔少上班族推介嘅隱世寶藏！御珍味係一間以東北菜為主嘅餐廳，餐廳雖然係小店，但店主用心製作唔同好味嘅手工餃子，啱晒唔鍾意食粥粉麵飯嘅你，將水餃當正餐。除咗水餃，仲有各種特色嘅東北菜式，同樣令人驚喜。手工涼皮御珍味嘅涼皮每日新鮮製作，所以口感特別爽彈，掛上同樣自家調製嘅辣汁，令清涼嘅麵條喺麻辣之中帶點微微嘅辛香。餛飩遇着繁忙時間，就會見到師傳不停咁手工製作餛飩，保證新鮮好味。我哋揀咗豬肉蝦蟹仔餛飩，餛飩皮做得非常簿，配料有豬肉、蝦同埋蟹仔，豬肉增添餛飩嘅肉汁，而蝦蟹就擔當鮮味嘅來源，認真做到皮薄餡靚。肉夾饃講到東北小食又點少得肉夾饃呢！酥脆嘅圓形外層饃皮，配上內層則軟腍而多汁嘅五花肉，肉質豐富，而味道充滿濃厚嘅鹹香味。豬肉酸菜包微酸嘅酸菜恰好中和咗豬肉嘅油膩感，仲突出咗豬肉嘅鮮嫩同埋肉香，軟綿綿嘅肉包外皮，亦因為吸收咗豬肉同埋酸菜嘅味道而變得層次豐富。…Read More

來都來了九龍城，有無mark開邊個姐姐先？我就搵開隆姐，講緊嘅當然係泰國大廚隆姐啦！九龍城作為香港嘅小泰國，有唔少正宗嘅泰國菜餐廳，其中開業超過20年嘅隆姐泰國美食館都算係區內嘅名店，而且食物選擇多，唔少食材同調味料由泰國空運到港，味道充滿泰式風情，成為我哋其中一間嘅泰國菜食堂。沙嗲串燒隆姐泰國美食館嘅沙嗲串燒有多款肉類蛋白質選擇，全部即叫即烤，我哋叫咗串燒雞肉同豬肉，兩款都有淡淡嘅焦香味，大火燒烤令肉汁豐富，配上濃厚花生味嘅沙嗲汁就更惹味啦！醃海鮮沙律醃海鮮沙律以鮮魷、青口同蝦做主角，全部都非常新鮮，其中鮮魷同蝦都非常彈牙。至於酸酸辣辣嘅泰式沙律汁，加上生菜同木耳，口感同層次都做到。肉碎生菜包豬肉碎配上切碎嘅紫洋蔥同辣椒，令辣味相當刺激，絕對係經典嘅泰國菜！泰式辣椒膏炒蜆好有鑊氣啊！隻隻炒蜆都大大隻，漲卜卜，沾滿泰式辣椒膏醬汁，更加惹味！…Read More

荃灣出名多野食，但你的荃灣美食清單有越南菜嗎？位於荃灣嘅Ha Noi越南菜，係當區新開而且人氣高嘅越南菜。由各種嘅越式小食、越式牛河，甚至越式甜品，價錢實惠親民，選擇多之餘，部份食材調味料更係源自於越南，能讓你感受正宗嘅越南味道，令你越食越滿足。河內小食拼盤每次去越南餐廳，大埋頭嘅小食拼盤真係走唔甩：越式炸春卷、香茅雞翼同手打蝦餅炸得非常香脆、安南鮮蝦米紙卷則由滿滿嘅鮮蝦填滿整個米紙卷，加上用清新爽口嘅生菜包裹住，口感一流，加上微酸嘅魚露，非常清新。西貢牙車快啖啖肉嘅手撕雞肉，加上爽脆嘅椰菜絲同蘿蔔絲，口感豐富。撈埋魚露、花生等配料，更令人非常醒胃。重量級越南火車頭湯頭用上牛骨同香料長時間熬煮，入口清甜而不油膩。配料數量多如火車頭一樣咁大陣仗，有牛腩、牛筋、生牛肉、扎肉同牛丸，當中嘅牛腩同牛筋嘅肉味香濃，肉質軟腍而不爛，搭上同樣肉味濃郁，而口感彈牙嘅牛丸，肉控表示非常滿意。…Read More

放假就當然想放慢步伐，享受生活的每一細節。講到慢活，唔少人第一時間可能諗到去間cafe嘆杯咖啡，但如果你同我哋一樣唔太飲咖啡嘅話，又有無諗過泰國菜同越南菜都可以帶俾你一種小清新嘅情調呢？位於太子嘅COSY，餐廳從名字就話你知，佢哋係重視舒適嘅環境，至於食物走泰越風，更能為味蕾帶嚟東南亞嘅特色風味。小食拼盤泰國菜嘅小食選擇多，叫拼盤就可以滿足晒所有人嘅願望。拼盤包括蝦餅、魚餅、墨魚餅、春卷、牛油雞翼等，份量十足。其中春卷炸到外層非常鬆脆，而且餡料多，令口感非常豐富，加埋泰式酸甜醬，成為拼盤嘅MVP；另外，牛油雞翼嘅油香十足，邪惡又美味。脆皮咖喱牛腩脆口嘅外皮配上軟稔嘅牛腩，兩種完全不相同的口感交錯替換，層次非常豐富。加上牛腩屬於半肥瘦，牛香與油脂香亦隨着咀嚼喺口腔裏面大爆發，而且香濃惹味嘅咖喱，令味道更錦上添花。泰式冬陰功海鮮湯金邊粉冬陰功湯底酸酸辣辣，非常醒胃。至於配料份量十足，有青口、魷魚、蜆、蝦等，更增加湯底嘅鮮甜味。…Read More

唔少香港人嘅成長，都會喺屋邨留下過歲月痕跡，80後嘅我哋都唔例外！昔日屋邨嘅冬菇亭大牌檔，食物雖稱不上高質，但就記錄咗一張一張的快樂同學笑臉，代表住滿足卻又簡單嘅那些年。嚟到南山邨除咗尋找回憶，更可以喺沛華園得到熟悉嘅味道。沛華園主打傳統嘅港式車仔麵，惹味嘅自家辣醬，更加係我的最愛，讓我回味無窮。五餸車仔米線大大粒嘅豬紅口感滑溜，一咬即碎，絕對唔係混水摸魚嘅雞紅；炆得軟腍而味道清甜嘅冬菇，夠晒入味，嗰份經典嘅車仔麵風味一湧而出。不得不提嘅係咖喱魚蛋同豬扒，魚蛋嘅魚味濃又彈牙，加上香濃嘅咖喱汁，非常惹味；炸得香脆嘅炸豬扒，細心另上，夠晒脆卜卜。六餸車仔烏冬講懷舊又點少得索汁嘅豬皮同牛柏葉呢！兩款配料都索晒沛華園嘅自家辣醬，夠辣夠惹味。至於魷魚同豬腸同樣爽滑彈牙，口感唔靭。另外，烏冬亦係最佳嘅掛湯麵底，滑嘟嘟嘅烏冬上面充滿惹味嘅辣醬，值得推介。…Read More

甜甜哋嘅壽喜燒相信人人都鍾意，但原來除咗打邊爐之外，元朗嘅麵麵俱到更將壽喜燒製作成拉麵湯底，微微帶甜嘅湯底加上各種配料，令味道更濃郁豐富，拉麵更掛湯呢！不過，唔知日本人見到壽喜燒配上拉麵，會唔會激嬲佢哋呢？唔理喇，因為真係好好味㗎！椒鹽炸雞軟骨小食就揀咗椒鹽炸雞軟骨，炸雞軟骨炸到脆卜卜，灑上惹味香口嘅椒鹽，絕對係最佳佐酒小食之一！麵全食麵全食嘅配料，上枱真係嘩幾聲！有齊牛肋骨、豚軟骨、豬皮脆脆、虎蝦、蟹肉、鳴門卷、味付筍片、蔥花、紫菜絲、芝麻、炸乾蔥等，特別鍾意滷得非常軟腍入味嘅牛肋骨同豬軟骨。麵麵俱到嘅壽喜燒湯底亦經過改良，除咗基本嘅味醂、醬油、清酒等調味之外，仲混合咗蔬菜、大骨以及不同香料，長時間熬製而成，令到微微帶甜湯頭更加濃郁豐富，容易掛湯！醬油慢煮煮豚軟骨配脆脆豬皮豚骨湯烏冬麵麵俱到嘅烏冬一向係餐廳嘅名物，烏冬純白彈牙，加上豚軟骨、豬皮脆脆、鳴門卷、味付筍片、蔥花、紫菜絲、芝麻、炸乾蔥等配料，同樣吸引。…Read More

食Foodcourt主要係貪圖選擇多，享受不同菜式選擇嘅過程，今日喺K11 Musea Food Playground經過一輪美食嘅內心掙扎後，由主打日本菜嘅Oomaki勝出。Oomaki嘅廚房雖小，但都有無限嘅可能，日式手卷、鐵板咖喱、壽喜燒都有，而且出品帶被你被低估嘅驚喜！拖羅刺身壽司手卷盒套餐份量十足，除咗Oomaki招牌自創名物手卷，更有手握壽司、拖羅刺身、沙律菜、枝豆以及麵豉湯。其中Oomaki嘅自創手卷賣相精美，以一個U型木盒裝住，揀咗吞拿魚作餡，加上白飯以及新鮮脆口嘅紫菜，口感一流，令人回味無窮；刺身有齊赤身同拖羅，兩款都非常新鮮；喺foodcourt嘅手握壽司竟然係由職人壽司師傅即叫即做，極具誠意。…Read More

尖沙咀K11 Musea係走設計風格嘅人氣商場，而能夠入圍成為商場内嘅餐廳同商店，相信都有一定實力呢！而作為遊客同本地人都必去嘅商場，港式餐廳當然唔少得，位於美食廣場嘅香港情懷絕對係代表。香港情懷有不少港式美食，其中馳名特式咖喱可以話係代表作，而且更不時更新餐牌，充滿誠意。鮑魚滑雞煲+白飯香港情懷又點少得煲仔系列呢？呢個鮑魚滑雞煲味道濃郁，送飯一流。而且煲裏面嘅鮑魚數量都唔少，有成四隻，而且隻隻都非常彈牙。雞件亦都略略炸過，令雞肉肉質保持鮮嫩多汁。加上顏色繽紛的配菜，例如青紅椒、芹菜、洋蔥等，為呢個雞煲帶嚟味覺同視覺嘅均𧗾。凍檸檬茶最能代表到香港嘅飲品莫過於凍檸茶！一杯出色嘅檸檬茶，濃郁嘅紅茶底必不可少。加上新鮮嘅檸檬切片，兩者簡直完美結合。…Read More