s9901043的个人专页

等左30分鐘都唔出餐，女店員仲hea我話水餃要耐過雲吞⋯⋯啲炒野、炸豬扒乜都出晒啦，真係虧你講得出口。野食味道算正常，價錢以午餐黎講還好。酸辣水餃麵啲水餃係白菜，同個人預期既唔同。不過咁既質素，隨便搵一間上海餐廳都可以做到，計埋佢既服務，可以話完全冇幫襯既理由。最令人憤怒既始終都係要客人等到2046既服務態度。咁鐘意等埋一齊煮，你咪唔好煮，咁客人都可以選擇唔黎食。事後睇返Google Maps啲評價，2.3分，等埋一齊煮係平常事，好啦，下次會再做足資料搜集⋯⋯結論係唔會再幫襯。…查看更多

Pizza Express過去都有幫襯開，兼且都覺得味道OK，算係Pizza之中既表表者。但點知冇幫襯一排，再幫襯就出事啦。個人對Pizza既要求真係唔高，普通連鎖店既質量已經接受，但用OpenRice 叫個外賣，你俾我個pizza係又濕又冇茄汁又冇芝士又冇點焗過，真係仲衰過食麵包。睇成品就知有幾咁⋯⋯一個Pizza已經足夠睇清楚成個集團既待客方式，真係難怪客人越黎越少，怪得邊個⋯⋯做生意做到咁，真係自我檢討下啦！人在做，天在看！…查看更多

呢間煲仔飯真係一絕，已經唔係味道既問題，佢重新定義左何謂煲仔飯，因為佢真係得個煲，將啲飯放入個煲，而係冇煲過既飯。餐牌寫住飯焦+$10，有食過煲仔飯既人，見到都應該一頭霧水⋯⋯然後答案出現啦，原來唔加個$10，個飯係真係可以冇煲過，煲係完全唔熱，個飯毫無香味，只係將啲飯放係煲入面。做生意做到咁，真係非常可恥！茶樓$2、30個啲蒸飯，但就收你$80-110一個飯，作為一個人，真係咁樣做野法都得，完全當啲食客係傻仔咁。…查看更多

呢間花甲粉都開左一段長時間，啲相關關注組推介左一段時間，今日機緣巧合下終於去試，點知竟然係伏到冇得再伏既級數⋯⋯🥲🥲🥲叫左個花甲粉，香辣湯，大辣。呢間餐廳係採取先付形式，俾完錢先有野食。平心而論，小弟都食過好幾間花甲粉，對花甲粉既要求都唔太高，但呢間真係呢⋯⋯簡直係一絕⋯⋯香辣湯，竟然可以做到唔香又唔辣，成個滾水湯咁，完全唔明點做到咁既質素，個湯啲色淡到呢⋯⋯真係不可一更不可再另外呢間餐廳啲飲品都食水都深，紙包裝檸檬茶都叫價$8，如果係沖既都算⋯⋯紙包都咁既價錢，真係⋯⋯餐廳既店員仲好落力咁叫人加錢要小食，但真係呢⋯⋯你不如認真做好碗花甲粉仲好啦⋯⋯有啲野真係一睇就知，一食就明…查看更多

個人一向都有幫襯開唔同既餃子店，對餃子既質素都有一定要求，而呢間海樂餃子無論係價錢定食物質素都係水準以上，所以係度寫幾隻字推介俾大家。話說早幾年係鰂魚涌附近返工，有幫襯開一間餃子店；花膠湯底、芝士餃，同呢間非常相似。返查之後，發現原來真係同一間黎，估唔到隔左咁耐又會開返。記得對上係鰂魚涌間鋪好細間，坐就真係麻麻；今次重開係北角，裝修似係用返上一手，雖然唔特別靚，但都整整齊齊，坐得都舒服。慣性叫左個芝士餃子麵。個湯唔錯，應該真係冇味精既，飲落都清新舒服。麵就正常上海麵，份量充足，食得飽。至於重點既芝士餃，雖然做唔到好誇張個啲拉絲效果，但都有咁上下芝士味，食落唔錯。如果唔特別想食普通白菜、韭菜個啲，呢個會係一個唔錯既選擇。如果呢間鋪開係樓下，應該會再幫襯，$45有一定質素，兼且食得飽，算健康，性價比唔錯。但個人已經冇係附近返工，只能睇下有冇緣再黎。…查看更多

咁岩經過天后，唔知有乜好食，就隨便入一間鋪頭試下，最後揀左呢間華姐清湯腩，原來係米芝蓮推介，盛惠$58。味道黎講都OK，但未至於有乜野亮點。一般清湯腩河就賣緊四十幾，而呢度要成$58，明顯有$10以上係因為米芝蓮推介。真係食過一次就夠，明顯唔值呢個價。另外呢度既用餐環境都幾劣，更加唔值呢個價。…查看更多

朋友生日飯，見有YouTuber宣傳呢間台式火鍋餐廳，睇片啲肉既質素相當唔錯，而店主又講到對台式火鍋好有抱負咁，就決定去試一試，點知就中晒伏⋯⋯宣傳片見到既肉同實際食到既肉係完全兩回事⋯⋯個人都經常出街打邊爐，都知任食邊爐中伏既機率相當高，再加上曾經係荃灣邊爐中過伏，所以都特別小心，預先睇定啲食物相，而唔少食物相其實已經透露左玄機，見到好多相既肉都有差唔多一半係白色⋯⋯不過問左生日位朋友意見，都係想去試下，終於難逃中伏既命運。（事後留意到之前已經有其他食客係度預先透露過真相，但當時未有留意到，白費左佢既苦心⋯⋯）呢間火鍋有分四個等級，因為餐牌有寫就唔特別係度多講。我地叫左第三個等級，當中包括有M9和牛同日本茶美豚。啲M9和牛一黎到真係嚇死人，有一半係白色既⋯⋯個人希望只係個別例子，於是再叫多兩碟，點知黎到既都係一模一樣，有一半係白⋯⋯咁樣既肉，根本只係單純既肥膏，店主好意思叫人食？佢自己都食唔落口吧⋯⋯其他豬同羊都偏肥，個人已冇心情逐張去影，不過簡單黎講就係酒樓啲平價任食邊爐既質素⋯⋯店主對台式火鍋又話好有抱負，真係完全感受唔到⋯⋯到呢個位真心有啲嬲。湯底又係一大敗筆。個人都食過好幾間日式或者台式火鍋，心裡有個底係點。呢度個湯真係淡到⋯⋯壽喜燒冇壽喜燒味，屋企用二、三十蚊枝既豉油、味淋、清酒溝都好食過佢，refill啲湯既色淡到紙包裝菊花茶咁⋯⋯個麻辣湯食唔到麻味同辣味，refill啲湯係白色既⋯⋯對台式火鍋既抱負呢？去左邊？呢度仲有任叫手搖飲品。味道黎講算正常，但有另一個問題。呢度既手搖飲品真係要食客「手搖」，唔單只我地枱，其他食客都要「手搖」，因為杯野飲黎到個底係熱，要食客自己努力去搖返，先至令到杯野融到啲冰⋯⋯真係當啲食客係阿四咁⋯⋯總括黎講，如果只係當佢啲平價任食邊爐，叫最平個餐，應該都可以挨近合格線，同平價任食邊爐既質素差唔多，而價錢相對比較貴。但叫第三等級呢個餐，就真係得一肚氣，完全提供唔到個個質素既肉，俾啲咁既肥肉話係和牛⋯⋯搵YouTuber拍到啲野好靚，但實際俾食客又係另一回事，仲要自稱對台式火鍋好有抱負，但啲肉既質素同個湯底⋯⋯與其搞咁多宣傳、裝修，不如認真做返好啲食物質素⋯⋯…查看更多

忠言逆耳，但為免增加更多既受害者，本人都要寫返個食評，以免有其他朋友無端端浪費自己個幾兩個鐘去排呢間米線⋯⋯因為有關注組同YouTuber既加持，令本人相信左呢間老闆娘會真係好特別，會比其他米線鋪好食，世一，但結果根本完全唔係。排隊等入去時，店員態度已相當不友善，完全係自己唔怕冇生意咁。排隊既環境相當惡劣，冇冷氣冇風扇都唔緊要，店員竟然叫食客企下垃圾桶隔黎，哩點實在無法接受。食物質素方面，呢度兩餸米線就$60，唔包野飲，而出面一般非連鎖既米線鋪就一般$4X已經係兩餸包野飲，相對黎講係貴左差唔多20%。呢度既米線個湯相對係熱，酸辣黎講比出面更加酸。米線同一般米線鋪冇分別。餸既話，量會比一般米線鋪多，另外會有相對多既炸物選擇。但總括黎講都只係一般米線鋪既水準，食過一次就唔會想再黎。至於用餐環境可以用惡劣黎形容，冷氣唔夠，座位非常密集，冇隔板又需要搭枱，防疫意識完全係零，隨時食完就有機會確診既感覺。總括而言，就係一間需要排一個鐘有多，特別貴，用餐環境特別惡劣既一般米線鋪。如果只係因為好奇心而幫襯，一定會後悔。…查看更多

已經唔係價錢或者係味道好唔好，而係誠信既問題。尋日買左六個蛋撻，但返到屋企發現只有五個。雖然只係小數目，但都嘗試與該集團客服聯絡，結果並未作出任何跟進。作為一間食店，少不免係會有犯錯，但俾少左野又唔作出實際跟進既集團，哩樣真係接受唔到…查看更多

大鴻輝成層都係打邊爐，理論上係得個度既鋪頭都應該唔會差，但結果總係超乎想像，見到某雜誌係咁宣傳依間就同朋友去左，結果只有一個字「伏」。價錢黎講尚可接受，198加一，放題加邊爐，睇落好多選擇咁，但有時選擇多唔一定好，反而正正經經做邊爐會仲好。先講等位，係冇顯示牌，個哥仔俾左飛之後，問佢幾耐，佢就話要check POS（佢係有禮貌既），結果一等就等左個半鐘⋯⋯每枱會送一客魚生船同泰式生蝦，泰式生蝦每人兩隻，味道尚可，係個汁比較怪。而魚生船呢，架船好大，但結果一人只有一塊勁薄既三文魚，同每樣唔太新鮮既魚生各一塊⋯⋯大佬呀，你不如唔好送啦，超級寒酸，你當我乞衣咩！不過佢個牛肉係OK既，雖然係比較薄，但肉質算唔錯。不過可惜既係佢個豉油同湯底，豉油極淡，似個啲98蚊邊爐豉油溝水既效果，而湯底亦都極淡，甜豉油湯淡到清水咁，而豬骨湯似乎係味粉開，有陣公仔麵既怪味咁，糟蹋晒啲牛肉。炸串，依個係我朋友食，佢食左皺一皺眉，話陣味非常奇怪，我冇食就唔作評論啦。燒烤串，我食左牛舌，個牛舌真係相當誇張，係完全冇味既⋯⋯，另外幾串都係我朋友食，其中塊炸雞皮，我估都係用千年油炸多，結果朋友一食就想嘔出黎咁⋯⋯總括而言，鋪頭既員工服務其實唔差，但排隊個系統就極有問題，火鍋湯底同醬油都淡而無味，燒串同炸串都係伏，不過啲牛肉質素係唔差既，但就俾湯底同醬料糟蹋晒⋯⋯建議店家正正經經做返好個火鍋會更加好。…查看更多

唔明點解依間店可以有咁多好評，但為左大家著想，小弟覺得自己有責任寫返個真相出黎。Lunch 60蚊唔連野飲，係屯門區黎講算係少少貴。不過價錢唔係問題，最重要有返相對既質素，但顯然佢唔合乎基本要求。咖哩吉列豬扒飯小弟對咖哩要求唔太高，但依碟飯真係⋯⋯首先，咖哩係冇咖哩味既，似係現成既超市咖哩粉開出黎，唔似日本咖哩，亦唔似港式咖哩，唔明點解間鋪不斷話主打咖哩。吉列豬扒，極乾，隨便一間茶仔既質素都好過佢。最後係啲飯，啲飯竟然係未煮透，咬落去仲硬挖挖，真係好攞命。小弟向來都好少寫食評，但依間真係唔寫唔得，咖哩吉列豬扒飯，無論咖哩、豬扒定飯，每一樣都係茶餐廳既質素以下，真係可相可恥！…查看更多

新開時見好多人幫襯，隔左幾多個月終於冇乜人黎試下，點知一試就中伏。首先係佢個餃子，不單只啲油多到癲左咁，仲要煎到燶晒，味道平平無奇。然後係個辣豬骨拉麵，個湯唔夠熱又淡，叉燒雖然肥但無冇乜味，不過最誇張既地方係啲麵超級超級少，仲細過普通一碗雲吞麵。最後不得不提係依度既員工服務態度，莫講話日本餐廳，連一般茶餐廳都好過佢多多聲，唔叫都唔俾水你飲。個人食過無數間拉麵，但差到佢咁就真係第一次見。當然依個只係屯門分店既表現，不排除其他分店會俾依間好，但霸嗎依個品牌真係俾間分店搞彎晒，食過依間都唔敢再試其他分店了。…查看更多

從前在旺角區工作，久不久便會來富泰家食個撈麵。現在工作地點轉移至港島區，因為懷念那種撈麵的味道而遠道而來。香港知名的撈麵店不多，想得出的有尖沙咀的芝士豬頸肉撈麵，還有就是中環區的雞扒蔥油撈。雖然富泰家並未有這兩間般馳名，但就勝在選擇多，可選擇的款式不只限於一個。和過去一樣，個人選擇了雞翼撈麵。套用了各大米線店的原理，選一餸的話，雞翼會有三隻，兩餸的話就只有兩隻，個人以精明的頭腦推斷出選一餸才是最合乎性價比的選擇。撈麵來了，如果就這樣直接吃進嘴的話，那只能發揮該撈麵味道的50%，這樣的話沒有意思。雞翼撈麵 - 一般的雞翼撈麵，吃上去並不過癮要吃出這個撈麵的真味道，我們便必需要加辣椒油，大量的辣椒油，那才是正確的吃法，能吃出撈麵的真味道。如此這般，在這裡值得推介的是混了辣椒油的撈麵，真的是不吃不可啊！…查看更多

琴晚先食完,d雞d炸皮勁厚,肉勁乾身,最古怪成個筒都係油,最有問題係d粟米,d粟米細到無倫另外請埋d暑期工,都唔知係咪想做野,係度玩黎玩去,晒d客時間…查看更多

價錢係咁升,甜酸醬都要加錢,人渣既行為,最新出既飯包,極度難食,仲要勁貴...…查看更多