今日收工同老公撐枱腳，又發掘咗一間工廈小店，係和洋風fusion菜嘅餐廳，環境好溫馨～
叫咗二人餐：是日餐湯係甘筍忌廉湯，好杰身，滿滿打碎咗嘅材料，有甘筍、煙肉等，好足料。
沙律揀咗牛油果同三文魚兩款，蔬菜都好新鮮，擺盤仲好靚𠻹！
小食就揀咗炸物拼盤，有齊薯條、雞軟骨、墨魚咀、洋蔥圈，同埋炸雞，開心share就啱晒喇～
主食揀咗signature嘅千層吉列豚，上枱超厚切，切開十分脆，裡面係一片片豚肉卷成嘅肉扒，調味食到淡淡嘅黑椒香，配埋咖喱飯超下飯。
另一味揀咗豚肉生薑燒，係好家常嘅日式料理，調味恰到好處，好有家的味道。
最後叫埋兩杯特調飲品，夕燒係新鮮橙汁配上espresso，攪拌嘅時候就見到橙嘅渣，真係好fresh喎！另一杯叫咗緩々空氣，係Tiramisu配咖啡，好似飲緊甜品咁，超好味啊！
