今日去左屯元天都各有一間分店嘅 "至尊雲吞麵雞煲"，除左主打有茶餐廳美食之外，仲有超平價兩個鐘任食雞煲火鍋放題，依度環境舒適，坐得舒服，聚腳好地方。
任食雞煲火鍋放題 : 星期一至四每位$178/2小時，埋單每人唔使$200，認真抵食 ~
4
首先係10款火鍋湯底裡面揀一款，有花甲雞煲、酸菜魚煲、咖雞哩煲、蘿蔔牛腩煲等等，而我就揀咗最受歡迎嘅至尊惹味雞煲，店員話大部份嘅客人都係揀依個鍋，辣度有5款，唔想食辣野嘅我哋要左走辣，大概15分鐘內店員就送上一鍋雞煲，份量非常多，睇起嚟唔止一隻雞咁少，雞肉嫩滑夠入味，都好厚肉，唔會有好多骨，調味又啱啱好，走辣都咁好味，仲可以無限任加雞件。
雞煲食到大半就可以叫店員加湯打邊爐，點餐紙有幾十款免費追加食物 : 肩胛肥牛片、鯇魚腩、豚肉片、鮮蝦雲吞、鮮牛肉、海鮮沙律丸、竹昇麵等等，款式雖然唔可以話多但都唔錯架。
值得一讚嘅煉奶炸饅頭，即叫即整，外層鬆化，裡面軟綿綿，沾上香甜煉奶，食起嚟更美味 ; 仲有爽口彈牙又大粒嘅鮮蝦雲吞，食完再加單。
飲品方面除左各式汽水之外，亦有羅漢果杞子菊花茶、豆漿、咖啡、奶茶、檸檬茶等都係免費任飲，揀左羅漢果杞子菊花茶，食完火鍋清下熱啦 ~
