堤岸酒吧及餐廳

好耐無去皇家太平洋酒店嘅buffet，今次去全因朋友推薦佢有新promotion澳洲有機香薰護膚專家品牌CANVAS同佢哋crossover 左個半自助餐，幫襯就即有「CANVAS 玫瑰保濕防曬套裝」一份，套裝包括玫瑰潤澤潔面梳乎厘、玫瑰水凝面膜及天然清爽透薄防曮乳液 SPF30各10毫升一支。最緊要更送您天然香薰工作坊乙次及 CANVAS 現金折扣券，剩係咁都$360，又有得食又有得玩，都值得鐘意呢個brand嘅朋友試下，餐飯差唔多唔洗點俾。

呢個海洋美饌半自助餐連2小時仲可以無限暢飲澳洲佳釀，又或者送個玫瑰氣泡蝶豆花茶，當晚幾個朋友試左，都覺得勁超值。

前菜有勁多唔同嘅沙律、凍肉盤、三文魚忌廉芝士多士同蝦沙律等等，又有湯飲，甜品又係好多唔同嘅選擇，到少我覺得呢個價錢已經值回票價。

主菜選了香烤寶雲酥羊架配蘑菇燒汁同香煎虎蝦配香烤薯仔及香草忌廉汁，另外朋友嘅燒海鮮同魚都唔錯。

講真，唔夠膽講係點樣神級精彩不能錯過，但酒店以呢個價錢，食物唔錯又有咁多禮品送，作為女士同三五知己食飯絕對係一個好選擇。

另外，佢有提供幾個唔同嘅sparkling tea ，白桃氣泡伯爵茶、柚子氣泡玄米茶都係我當晚favorite ，選擇都多，有興趣可以試下唔同嘅味。記得promotion 到月尾，有興趣快啲book啦。