金玉滿堂

营业中

休息中

呢間金玉滿堂坐落於旺角煙廠街，唔算太難搵，近好景商業同新寶戲院。爽滑魚皮而家越來越少舖頭有做，就算有都唔夠爽，但呢碟冇咁嘅問題，爽口得黎配上青芥辣，好過癮。唔好睇佢細細碟，因為佢冇花生墊底，基本上成碟都係魚皮，份量好足秤。菠蘿咕嚕肉啲肉唔鞋，都算幾淋，甜酸味好平均，而且食得出係用鮮菠蘿，誠意十足！薑蔥魚卜煲，薑蔥味唔會搶咗魚卜嘅鮮味，魚卜唔韌，好入味，個煲夠晒熱，好有鑊氣。香草芥末奇脆元貝皇，呢味餸好特別，元貝、脆飯焦、茄子、本菇、芥末炒埋一碟，原本幾樣口感同味道係大纜都扯唔埋嘅食材，估唔到兜埋一碟又變咗一款好新穎好好食嘅餸菜。尤其係啲脆飯焦，索晒啲芥辣味，前所未有嘅新口感！