是晚湯底揀咗麻辣雞煲，雞煲要咗小麻小辣，煮滾一陣打開即刻聞到香噴噴，嗰陣麻辣味非常強烈睇見就流口水🤤雞件嫩滑啖啖肉，煲內仲有唔少三色椒、洋蔥、南薑、蒜頭等，十分足料。
食完雞煲梗係加湯打邊爐啦，自助區應有盡有🤤牛肉有三款牛板腱、肥牛同手切牛，豬肉都有兩款黑毛豬肉片同埋豬腩片，另外仲有唔少海鮮，蜆、蠔、蝦、蟶子、九肚魚、魷魚等等。
蔬菜亦是十分多款，唐生菜、西洋菜、娃娃菜等，仲有至愛嘅芫茜添🤤其他有粟米、南瓜、蓮藕片、豆腐、鴨血、蟹柳、各款丸子、腸仔等，多度數都數唔曬。
如果覺得打邊爐都仲未夠，旁邊仲有一個熟食區，有新鮮炸起嘅韭菜雲吞、九肚魚、咖哩魚蛋、四季豆炒肉鬆等，仲有幾款涼拌菜同新鮮切嘅水果😋
除咗多嘢食外仲有勁多款飲品，除左一般紙包無糖茶、罐裝汽水外，仲有餐廳自家製嘅冷泡茶、紅豆涼粉冰、雜果冰、檸檬茶、竹蔗茅根水等，當然唔少得啤酒添啦，罐裝啤酒都有好幾個牌子，哈哈，真係好強！
甜品就有雪糕同芒果布甸，強烈推薦朱古力同焦糖咖啡口味雪糕，勁好食😋
食到飽到上心口都係二百幾蚊，超抵食！！
