上次食咗泰國嘢，今次同朋友試艇仔粉
午市時段好旺場，要等位
除咗艇仔粉、仲有多款魚蛋雲吞湯粉，另外有常餐、飯類、招牌炸物等
▶️ 麻辣雞扒烏冬 ($51)
唯一一款烏冬選擇，如果叫湯粉轉烏冬要加$6，同埋唔包飲品
本人唔食麻辣，所以叫咗走辣🙈
賣相係平平無奇一碗湯烏冬
雞扒連皮，肉質滑嫩，味道新鮮，偏多油脂🐔
烏冬並非日式烏冬，唔夠煙韌彈牙，比較實身似上海湯粗麵
好在唔易斷，食落算滑身
反而湯底出色👍🏻用上不含味精魚湯，鹹中帶魚鮮味，仲有大量青蔥，只係因為雞髀而油咗少少
成為呢碗普通烏冬嘅精髓
▶️ 雪山粒粒西多士 ($41)
上枱「嘩」咗聲😂比預期中大份
唔係一口西多士，而係兩口
每粒size好平均，正正方方好厚身
西多士口感唔錯🍞麵包為主，食落鬆軟棉密
外面不算香脆 ，未必啱鍾意脆口人士，但我幾like呢個，感覺冇咁熱氣
蛋味香，灑上少許糖霜，味道似高力豆沙👅
花生醬同煉奶分開上嘅，可能係唔想整淋啱啱炸起嘅西多士，同埋可以俾客人自己控制甜味
花生醬比較流質🥜有花生味但唔算香濃，煉奶夠甜
雖然唔係佢哋招牌菜，但個人覺得有驚喜同幾值得試 (好食過上次陳新記)
▶️ No.1招牌艇仔粉 ($48)
大部份人嚟都叫呢個
超多配料：叉燒、魚蛋、魚片、紅腸、炸魚皮、燒鵝
朋友話叉燒同魚蛋最好食，聽到隔離客人話鍾意魚片😆
河粉底質感唔錯，滑捋捋唔會太腍
湯底同樣用上不含味精鮮魚湯，朋友大讚之餘仲飲晒，一滴不留🍲
▶️ 凍奶茶 (+$4)
唔記得叫少甜，飲落有台式珍珠奶茶甜度🫣
完全品嚐唔出茶味
不過食完鹹嘅湯烏冬飲番幾啖都幾啱嘅，口渴之下都會飲晒
-
最出色當然係佢個鮮魚湯底🐟令佢嘅湯麵河粉與眾不同
其次係西多士有驚喜！
不過有個朋友叫咗生炸雲吞配沙律，份量好細，俾朋友取笑係佢嘅減肥餐🤣
環境狹窄啲，坐得比較迫，有機會要同人搭枱
因為長期有人等位，都唔好意思食太耐，費事阻住佢哋做生意
服務幾好，姐姐同叔叔有人情味
性價比高，平均$50/人有埋飲品
可以話係鴨脷洲嘅「特產」
