醉辣鮮 (天空之城)

营业中

休息中

平時出街食海鮮都有啲肉赤，住元朗嘅友人話試過高埔村天空之城有間蒸海鮮有無限量肉蟹，仲可以自己捉，即管睇下有幾新鮮！😝聽完店員介紹有個餐專係食肉蟹放題🦀❤️ 任捉任食，睇黎係我哋嘅目標。之後就有工具提供出去外面魚缸捉蟹同埋其他海鮮。揀好後有專人開殼清洗，再排到好靚仔咁等住清蒸大餐。😋一坐好就有碗是日精選老火湯，鮮甜又暖胃。隨後就靜待店員放好首輪食物：杞子蟲草花蒸雞、小籠包、Jumbo仿蟹柳。蒸雞件滑溜溜，小籠包夠晒爆汁juicy，作為開胃菜唔錯。套餐包括：生蠔、扇貝、鮑魚、海中蝦兩隻。生蠔甚為巨型，估唔到清蒸都保留到蠔獨特嘅鮮味；鮑魚蒸完都唔會好韌，點少少辣豉油已經好惹味；海中蝦🦐 更加係鮮甜無比；扇貝嘅配搭最為吸引，店家已經提供埋調配好嘅葱粒、金蒜及粉絲，鋪晒喺扇貝上面，熟左再淋豉油，美味至極！另外沙白、大蜆、肉蟹為任食。肉蟹真係隻隻都肥美有肉，特別係蟹鉗位十分厚身，友人係蟹痴表示極為滿足；沙白充滿海水鹹香，大蜆則粒粒鮮甜，連蜆汁都唔好嘥，一併落晒粥底。集合各家之精華落晒海皇粥底，鮮味無窮又下火，食唔晒仲可以打包好貼心。精美甜品係紅棗桃膠糖水，飲落清甜超潤，完全唔比海鮮失色。