憶食尚臘味煲仔飯

营业中

休息中

以前過嚟渡船街，淨係識得食日本嘢，同雞煲。前排經過呢間憶食尚煲仔飯，特別想試。因為以前食開煲仔飯，都要去油麻地廟街，但係環境一般，想食煲仔飯，都冇乜選擇。憶食尚嘅裝修好新穎，如果你就咁睇餐廳嘅裝修，你真係唔覺得佢係食中菜。除咗裝修新穎之外，呢度仲坐得好舒服，有梳化位卡位。我哋兩個人叫咗一個霸王雞，一個臘味煲仔飯，同埋一碟菜心。霸王雞好好食，佢啲葱好香，有爆過嘅。我咁啱配到下裝位，雞好滑，兼且啖啖肉！嫩滑嘅雞配上香蔥香豉油，好開胃又啱送飯！登登登登！最期待嘅係臘味煲仔飯！上菜之後，由侍應幫手撈起，服務一流。煲仔飯嘅料有臘肉臘鴨同埋臘腸，仲有最緊要嘅飯焦！個飯焦仲係脆卜卜，又香又好食！三款臘味之中，我都係最鍾意臘腸，肉同脂肪比例剛剛好。平時唔係好食飯嘅我，都食咗半煲呀！然後，我仲叫咗碟菜心。老公話我喺街度食菜唔抵食，但係偏偏呢度個個都叫碟菜，我就想試吓有幾特別。除咗菜心好嫩好新鮮之外，最特別係佢哋嗰個蠔油！佢哋蠔油係自家製，色水有啲似沙薑粉，係好香。呢度嘅侍應服務幾好！有問必答，仲好好咁介紹佢哋啲嘢食。呢度啲嘢食包括醬油都係自家製，誠意十足，實在非常之值得回頭！