淥烚年代

营业中

休息中

朋友話尖沙咀最近開咗間新嘅火鍋店，好耐冇打過邊爐，就決定去試吓。鹿茸菌燉花膠湯火鍋湯底我地點左鹿茸菌燉花膠湯，燉湯好足料，飲落非常清甜，完全有阿媽老火靚湯嘅味道。牛頸脊肉質鮮嫩，有咬口，切嘅厚度恰到好處，口感爽嫩軟滑。田園鮮菌盛蔬菜及菇嘅種類好多，有番茄、金菇菜、冬菇、粟米、油麥菜、生菜……全部都好新鮮。脆鯇魚片鯇魚片好爽脆，擺碟有心思，睇落似朵花。清酒蝦丸、黑松露豬肉丸、柚子墨魚丸丸嘅口味好特別，全部都係餐廳自己手打。清酒蝦丸咬落去淡淡清酒味，仲會爆汁。黑松露豬肉丸咬入去會見到黑色嘅松露，柚子墨魚丸亦都係有餡，質感咬落去好彈牙。蟹皇餃、帶子餃、養顏桃膠餃三種餃子亦都係自家製嘅獨特口味，個人最鍾意帶子，咬落去真係有成粒帶子，配搭新穎又好味。炸響鈴炸響鈴火候十足，喺店舖即叫即炸，上枱嗰陣仲係熱辣辣，淥完仲好香脆但唔油膩。八吋日本蟹柳的確係好長，有兩至三條一般蟹柳嘅長度，淥完都唔會散開，食落個質感都唔錯。總括而言，餐廳食物質素非常高，食得出配料用心製造，而且環境舒適，如果想打邊爐嘅朋友可以去。