NUTTEA (灣景廣場)

芝士奶蓋飲就飲得多，估唔到連堅果都可以整成奶蓋。Nuttea就係主打堅果奶蓋嘅飲品店，有唔少分店，今日行經荃灣就特登黎買番杯。荃灣分店係位於灣景廣場aeon地下，係出口附近，所以要行入少少先會見到。 
 
店面同其他分店一樣，都放咗一棟棟唔同嘅堅果柱，隔離仲介紹咗堅果奶嘅製作過程，可以話係非常用心，等客人飲得放心。 
 
首推伯爵朱古力堅果奶蓋茶！每日限定100杯，賣相非常吸引，有種漸變嘅效果，上面係朱古力堅果奶蓋，下面係伯爵茶，由深啡到淺啡色。第一啖可以先用鋪頭專設嘅小剷子筆一啖朱古力堅果奶蓋黎食，奶蓋有住濃濃嘅朱古力香味，用堅果整嘅奶蓋一樣係咁綿滑。第二啖可以鈄鈄地飲。第三啖可以將堅果奶蓋同伯爵茶攪拌，伯爵茶有種淡淡嘅茶香味，加上香濃嘅奶蓋，簡直係對味蕾上嘅衝激~