餐廳位置唔多，但係好有日本feel，睇住師父用心製作食品，食得安心。
叫咗個芝麻菠菜，芝麻醬超多，菠菜好甜，好好食，28蚊真係好抵。
再黎蒜香牛舌（68蚊）~ 牛舌超厚，蒜片都好足，我見師父仲加咗啲黑椒落去，仲更加香口。
第一主角出場！松葉蟹拉麵，真係估唔到隻蟹咁大隻，師父仲要係開晒所有殼，方便我地慢慢挑出黎食，就連個三角較位都開埋，超細心，女士食都唔怕難攪，仲有佢跟一大堆蟹膏，加咗落啲湯度真係好香好濃，一邊食一邊都有蟹味，我覺得係食緊蟹多過似食拉麵，蟹肉一絲絲咁食好甜好新鮮，又可以挑晒出黎加入麵入面食，真係好滿足。
第二主角~ 一板海膽拉麵，真係成板海膽，又係超甜超新鮮，拉麵入面仲有好多蜆肉，個湯底超清甜，成碗都係海鮮味。大大大滿足呀！
總結：有朋友覺得好貴，但我覺得298蚊食原隻松葉蟹真係好抵，另外198食一板超甜海膽，都係超值，而且拉麵都係爽口彈牙，真心推介~
