襟江酒家

今日中午第一次到襟江酒家飲茶，之前聽聞佢同蓮香樓都係主打懷舊香港路線，為了尋找兒時回憶，食番好耐都食唔到嘅菜式，決定一試。

一入門口，就被兩邊牆身的裝飾吸引住，左邊有幾個飾櫃，內𥚃放滿70-80年代生活用品，例如錄音機、膠拖鞋等等，喚起集體回憶。右邊整幅牆用類似「九龍皇帝」的字體寫下襟江酒家的歷史和飲食文化的傳承。

講番食物，整體來講係美味的。我終於食番好多年見唔到嘅鴛鴦飯，仲有芝麻卷，正常好味。另外叫左一碟三併燒味：叉燒、燒腩仔同埋燒鵝，叉燒好得，肥瘦適中，燒腩同埋燒鵝都好美味，最驚喜係送埋久違的蠔油豆。

點心方面，食左煎釀三寶、鳳爪、叉燒包、山竹牛肉、炸雲吞，整體高質。我揀左菊花併普洱茶，兒時味道，正。

服務來講都好周到，態度十分之好。

整體飲茶目的達到，懷舊兒時回憶充滿茶樓和腦海，值得再去。