譚仔三哥米線 (希爾頓中心) (已結業)

唔知點解，近呢幾個月「三哥譚仔」以驚人既速度喺沙田市中心區極速擴張，選擇既地點重要係針對住另外一個譚仔品牌黎打！Anyway，由於比較少食既關係，入到去都要睇menu睇左好一陣先諗到食咩！唔知點解，我覺得menu既format好有問題，令我唔可以好簡單咁搵到自己想食既野，所以呢度都搞左唔少時間！最後叫左一個三餸既麻辣米線。當晚雖然唔係好多人，但廚房仍然非常之慢，等左差唔多成十五分鐘先至整好。不過，返到屋企睇到食物質素都係值得等既。牛丸、豬肉、甚至冬菇都比另一個譚仔品牌黎得更有誠意，食物既質素唔會將貨就價，抵讚！至於個中辣既麻辣湯底亦都十分特別，入口第一啖完全唔會覺得辣，係要慢慢細味之後辣既感覺先會慢慢滲出黎，非常特別，不過對於鍾意食辣既我黎講都叫做辣左少少，鍾意「普通辣」既朋友都係叫返「小辣」穩陣D！至於個凍檸茶方面，都係一般貨式啦，冰唔算太多但係十分之甜，鍾意清淡既朋友好似我咁都係叫「小甜」好D。Anyway，整體食物質素都算喺中上既，只係服務效率方面重有好大既改善空間。下次有機會一定要試埋糊辣同埋酸辣湯底！