NUTTEA (時代廣場) (已結業)

本身自己都好鍾意飲奶蓋嘅飲品，今日經過銅鑼灣時代廣場口渴想買杯嘢飲，跟住就見到Nuttea, 之前都聽過呢間舖頭好出名堅果奶蓋，普通奶蓋就聽得多姐，用堅果整成嘅奶蓋真係第一次見，點知一試愛上。叫咗佢哋招牌嘅伯爵朱古力堅果奶蓋茶,本身諗住伯爵茶加朱古力係一個奇怪嘅組合，點知飲嘅時候完全唔甜好驚喜。Nuttea另一個賣點就係所有奶蓋茶都一杯三種唔同飲法，朱古力奶蓋好厚唔死甜，就咁食都唔覺得肥膩。伯爵茶濃郁，唔會因為奶蓋蓋過咗伯爵茶嘅味，最後將奶蓋同伯爵茶撈埋一齊，完全零違和感，仲飲到一種清新感覺添。珍珠奶茶或者奶蓋飲品本身俾人嘅感覺好肥，但今日呢杯伯爵茶朱古力堅果奶蓋一啲都唔肥膩，堅果對身體有益，幫助瘦身降膽固醇，初頭以為用堅果碎整成奶蓋好擔心奶蓋入邊會有堅果碎影響口感，點知原來佢打得勁滑，完全唔相信係由堅果製造出來。鍾意飲奶蓋嘅朋友一定要試Nuttea, 會令你對奶蓋飲品有新嘅睇法。