易牙台式料理

营业中

休息中

這間易牙分店多年來都是顧客不多，坐得鬆動。Menu上有七、八款set dinner，例如紅燒排骨、鹽酥雞排等，全部都包前菜，白飯，A菜和飲品。我叫了蜜味燒雞套餐，飲品就飲熱柑桔。老婆點了紅燒排骨套餐，但把飯轉為麵。先講下個燒雞套餐。下圖是整個套餐的樣子：前菜今次係素菜春卷(上圖右下)，少少脆，餡料軟熟，配以春卷表面的橙色酸醬，都幾好味。主菜呢，蜜味雞肉我起初以為是蜜糖味，點知唔係，原來是好特別的一種味：少少藥膳味，但又有少許甜味或醋味，總之係與一般茶餐廳的蜜糖味唔同，值得一試！雞肉本身都算淋，分量亦唔少，男仔都夠食！碟A菜其實是油墨菜，味道OK。但杯熱柑桔就非常普通，毫無特別，與茶餐廳的無分別。建議叫其他台式飲品可能會好啲。下圖是老婆點的紅燒排骨麵：啲排骨都幾淋，味道不錯，不會濃味到鹹，食完不會口渴，個湯底亦都香甜。麵條是粗而扁那種，口感不錯。總括來說，兩個主菜都好味。價錢卻說不上便宜，因為幾年前同一堆套餐才大約七十幾八十元，現在已升至九十蚊尾。