溫馨提示：此篇文章為自費食評，食物質素每日可能不穩定。
同行9位，叫咗好多嘢食，唔續樣講啦。呢度每位嘅醬料都係要收費$20嘅，選擇黎講唔算特別多，不過有齊港式火鍋需要用到嘅醬料。以同類型店舖黎講，服務亦都幾好。環境光猛，Keep 主播大家熟悉嘅熱鬧廣東歌，氣氛良好。
食港式火鍋除咗食配料，其實個鍋先最緊要。分別點咗個鴛鴦鍋（沙嗲／胡椒猪骨沙白），同埋我最鍾意嘅麻辣牛雜鍋。
前菜點咗川椒皮蛋，炸墨魚餅，臭豆腐，泡椒鳳爪。炸墨魚餅最好食，皮蛋臭豆腐正常，泡椒鳳爪我覺得唔夠辣，不過其他人就話幾好。
湯底方面，麻辣牛雜鍋推介，裡面超多了，牛肺入口係化開嘅，好好食，辣度正常，唔錯。（我本身鍾意辣嘅）
牛肉方面，果日推介嘅部位有腩頭，邊爪。本地騸牯牛。未算係好靚，不過收費公道，只係 $488。
其他推介火鍋配料：
豬黃喉，花雕雞潤，大竹笙，獅頭鵝腸，油鴨肶，手打墨魚丸，蝦丸，豬潤，豬大腸，大連蚌，黑柏葉
大家嚟開就即管嗌啲試下，應該無伏，一係無貨。
佢哋有個隱藏版嘅竹蔗茅根，有 Gin 係裡面，好好飲，不過都好快冧，量力而為。
食飽飲飽，每人$450，收費好公道
1
1
1
1
1
