地點：杏花邨杏花新城
菜式：cafe
餐牌：午餐系列有意粉，意大利飯同主菜9揀1，價錢由$68至$228不等。主餐牌任何主食類都可以加$48轉套餐，即係包是日餐湯，同凍熱飲品三選一。惠顧主餐牌飲品有半價。
1
日式原條鰻魚意大利飯 $115 另加一
日式原條鰻魚意大利飯果然有大大條原條鰻魚放係碟中間，鰻魚熱辣辣，食落帶豐富鰻魚汁，味道唔錯，口感都彈牙，伴有少少新鮮菜苗平衡下更好味。下底意大利飯撈埋菇片，菇仔同洋蔥絲，口感唔錯，味道唔會太鹹，非常濕潤。
帶子蟹膏蟹肉意大利粉 $128 另加一
帶子蟹膏蟹肉意大利粉有兩大隻帶子，煎得兩面少少燶，整得好嫩口，啖啖肉。意粉係幼身spaghetti，都幾al dente，每一條都充滿帶微微蟹膏既汁醬，好味。撈有好多菇仔同洋蔥絲，當然仲有唔少蟹肉。最後加有少少新鮮菜苗。
芝士薯條 加$28 另加一
芝士薯條用金屬兜加牛油紙上枱。薯條係粗身薯條，熱辣辣炸起，好粉淋。芝士醬另上，令薯條好滑溜美味。
兩杯飲品用木板上枱，伴有乾花小花束一支，仲襯埋色。
鮮雜莓奶昔 跟餐加$12 另加一
鮮雜莓奶昔好大杯，加有新鮮藍莓。口感滑溜，飲到雜莓籽，味道唔會過甜，感覺健康。
蘋果汁 跟餐加$13 另加一
蘋果汁 超大杯，加左唔少冰，夠凍，味道唔假。
今餐食物質素唔錯。座位正常，而抬頭望原來有好多絲花裝飾。餐廳上菜快速，服務都幾好。
