KEW+

营业中

休息中

呢個價錢呢個質素，真係一定唔會有下次。Menu好多選擇，點心，壽司，壽喜燒，全日早餐， burger，串燒，多到有啲驚訝，同時亦都開始擔心佢嘅質素。叫咗人氣推介 - 炸雞髀意粉$148，雞髀預咗一定係急凍貨，普普通通茶餐廳水平，意粉用黑椒洋蔥本菇炒，冇鑊氣冇香味，味道亦都偏淡，食之無味，棄之可惜。全日早餐有蛋，英式炸魚柳，煙肉，腸仔，粟米，茄汁豆都，牛角包比我平時屋企買嘅急凍氣炸牛角包仲差，自己用焗爐或者氣炸鍋焗，都一定脆卜卜，但佢嘅牛角包完全唔脆，又淋又韌。點心炸物拼盤，好普通，只得賣相吸引，荔枝球係流心奶黃餡，但入面啲流沙奶黃餡竟然有一浸怪味，我同朋友兩個人都有同一感覺。兩杯飲品，兩個主食，一個小食，埋單$550 。第一次為打卡，可以去試，但千祈唔好抱有任何期望，食物只係僅僅合格50分，只求充飢，不過我唔會比呢個價錢去食啲咁難食嘅嘢充飢。Menu整得好靚好吸引，但係選擇多嘅時候，餐廳只能夠流水式地準備定一啲質素唔好嘅食物去應付顧客需求，其實簡單講句，呢間餐廳就係food court質素，但需要付出精緻餐廳的價錢，自己衡量值唔值得吧。