首先出場有粉紅松露素菜餃，第一次於酒店享用下午茶可以食到熱辣辣中式蒸點心，高質得黎有驚喜！
精選中式美食仲有燉鮑魚伴金箔、沙律醬蝦多士及流沙紫薯煎堆仔，大推口感超級酥脆既蝦多士，沾上沙律醬香甜唔會漏，昇華口感層次。
鹹點有兩款：法式蟹肉鵝肝包、法式慢煮龍蝦酥盒，呢款法式慢煮龍蝦酥盒，龍蝦肉飽滿多汁、金黃色酥盒層層酥香鬆脆，牛油味香濃，口感味道並存。
甜點有多達七款，包羅萬有，甜品控既我望見都興奮！甜點包括野草莓凍湯、自家製士多啤梨拿破崙餅、自家製士多啤梨綠茶卷、士多啤梨熱香餅、金箔草莓意大利奶凍、英式鬆餅伴草莓忌廉及果醬、精選馬卡龍。
咁多款最愛自家製士多啤梨拿破崙餅，酥皮甘香鬆脆，每日新鮮烘焙，加入粒粒鮮甜士多啤梨、幼滑吉士忌廉，層次豐富，啖啖充滿士多啤梨香！
另外都好推介清新之選士多啤梨熱香餅，士多啤梨醬汁酸酸甜甜，熱香餅熱騰騰蛋香味濃，配軟綿忌廉同食真係冇得頂！
2
適逢摰愛生日，我一早於咖啡閣訂購人氣熱賣之彩虹蛋糕，絢麗迷彩色調，呈現雲朵般輕盈口感，帶有多達七款唔同甜香味，口感鬆軟濕潤入口即化，呢款甜點唔止外在一流，同時都好有內涵呢！
1
草莓戀人 中西下午茶套餐@九龍酒店 - 中間道酒吧
地址：尖沙咀彌敦道19-21號九龍酒店2樓
供應時間︰每日下午3時至5時
