📖 “留家廚房” 由劉健威劉晉父子打理, 主攻冇味精傳統粵菜, 於2004年喺天后清風街開業, 2012年於灣仔設分店.
🤗 今晚老友 “意大利長介” 負責訂位點菜, “長介” 堅持安排廂房, 座位闊落, 環境舒適, 服務殷勤到位, 十個讚. 食物方面, 初嗜太史戈渣, 菊花魚雲羹, 臭豆腐雲吞, 大開眼界! 整體食物質素Ok, 用餐愉快.
8
🥢 "長介" 預早點咗三個頭盤, 七道主菜, 兩款甜品, $6,080+茶芥+10%. “長介母后” 即場追加兩個頭盤, 一道主菜, 覇氣盡現.
🐚 頭盤... 醉鮑魚. 正常發揮.
🤗 太史戈渣, 點砂糖食. 鎮店名菜之一. 聽講成份有雞子, 蛋白質香味濃郁. 我覺得唔點砂糖仲好食. “長介母后” 聽到我話好食, 即埸追加多一碟 😂.
📖 翻查資料: “戈渣” 源於北方叫鍋炸嘅甜點, 傳至南方後, 江太史改良變成鹹點. 江太史又係乜水? 晚淸時期, 最後一屆科舉進士江孔殷, 身居要職, 更是有名食家. 由於他曾進翰林院為官, 翰林院又被稱為太史院, 因此他有江太史嘅別名. 其廣州大宅被稱為太史第, 經常用嚟宴客, 餐單食譜有 “太史食譜” 之稱, 名菜包括太史蛇羹同埋太史戈渣.
🐖 頭抽豬蹄筋. 夠腍, 點頭抽豉油, 不俗!
🥟 “長介母后” 追加推介: 留家香雲吞, 即係臭豆腐雲吞, 臭豆腐味道配上炸雲吞脆皮, 點埋辣醬甜醬, 一流!
🐟 主菜... 菊花魚雲羹. 口感豐富, 魚雲唔算腥, 當然落埋古乙粉效果更理想.
🦐 鴛鴦蝦. 蝦肉新鮮爽口, 味道Ok. 另外, 蝦頭蝦尾釀咗葡汁磨菇肉碎嚟炸, 帶香料味道, 我麻麻地.
1
🤗 “長介母后” 追加推介: 鳳凰焗魚腸. 非常出色!
🐥 古法鹽焗雞. 皮脆肉嫩, 可惜略鹹. 另外, 食咗一舊雞潤, 有驚喜喎.
🐖 沖繩黑糖咕嚕肉. 肉質嫩滑, 味道唔錯.
🐂 慢煮牛肋條配芝士腐乳汁. 肉質粉嫩, 脂肪比例均勻, 入口溶化, 神級之作!
🥬 梅菜蒸芥膽. 梅菜味道唔突出, 我唔鍾意蒸菜囉, 哈.
🍜 蔥油拌竹昇麵. 麵質爽口, 夠鑊氣, 掂!
🍯 甜品... 炖香梨杏仁茶. 杏仁茶夠熱, 味道夾到香梨, 掂!
🍡 懷舊芝麻卷. 唔夠實淨, 一般.
🍪 合桃酥. 鬆脆, 好食.
🍷紅白葡萄酒由 “意大利長介” 安排, 十個讚!
1
