紅葉冰室

营业中

休息中

話說尋日星期六嘅朝頭早有諗過下一去紅葉冰室食早餐，但係摸門釘，佢冇開舖。今日星期日午餐時間，即管又試吓睇吓佢有冇開先（之前都咁啱試過好多次都撞啱佢冇開門😂）。睇嚟今日我有啲運，有開啊佢。我哋兩個人去，一個叫咗焗芝士肉醬意粉配熱檸水，一個叫咗全日早餐（紐西蘭牛扒）配熱奶茶。焗芝士肉醬意粉：夠多汁多芝士，唔會唔夠醬汁撈，不過如果意粉做到有少少咬口會更好。全日早餐（紐西蘭牛扒）：牛扒係我鍾意嘅唔係太多調味嘅牛扒，薯餅同腸好味，粟米仲熱熱地嘅，炒蛋同埋沙律菜正常。奶茶：香濃幼滑至於服務方面，本身坐嗰個位好凍，所以就問個侍應講可唔可以校細少少，佢話要顧及其他食客唔可以校細。我哋都明白咁我哋就調咗去第二個比較細風嘅位。但係之後再有個食客坐嗰個位，但佢直接同老闆娘講，老闆娘就好體貼咁樣幫佢用遙控器較返細。如果職員都好似老闆娘咁體貼就好喇。