第一郡

营业中

休息中

呢間小店N年前幫襯過深水埗店，印象已經好模糊。新店搬咗去油麻地，雖然係彌敦道，但並不是地舖，而是從酒店旁的大廈入口搭𨋢上二樓。牛油果沙冰（$35）同我認知中嘅沙冰唔同，唔係有碎冰嗰款，呢杯十分creamy，勁滑身，偏向似奶昔嘅口感。淡淡嘅牛油果味，味道不錯。蟹膏蕃茄湯檬（$70）湯底帶酸，十分清爽開胃。配料有蟹膏餅、扎肉、豆卜、豬紅、蕃茄、香菜、芽菜、生菜，蟹膏餅好大件兼厚身，口感紮實，食落有蟹膏味；本人唔多好扎肉，但呢度嘅扎肉幾好食，彈牙，中間有啲爽脆軟骨，口感似雞軟骨腸；豆卜豆味濃；其他配料味道正常。檬粉份量足，算滑身，唔易夾斷。越式法包（$60）落單時可要求開二/三/四，細心。法包微暖，外層脆裡面軟熟有𡁻頭。配料十分豐富，有腩肉、札肉、肉鬆、酸菜、青瓜、芫茜、蔥、肝醬，各款嘅調味都唔錯，尤其酸菜唔會勁酸，芫茜好新鮮好香，肝醬咸咸香香。班蘭糕（$15）底面兩層十分黏身，中間夾住滑身嘅綠豆蓉，雙重口感，而且味道濃厚，不錯。PS：自助斟清水外，仲有班蘭水，聞落有香味但飲落同清水分別不大。