深井陳記燒鵝海鮮酒家

平時食燒鵝，通常都會喺酒樓叫半隻或例牌去食，有時都唔知乜嘢叫做正宗燒鵝嘅味道，前幾日去咗酒店嗰度休息吓，咁啱酒店附近就係深井，咁不如去試吓由細到大都講話食燒鵝最正宗嘅深井啦！
通常細細個聽到深井嘅燒鵝舖頭都係陳記，咁就直接去陳記食啦！

原來佢哋嘅下午時段接近2:00左右啦已經冇其他嘢食，只可以食燒鵝或者燒味類，咁既然嚟到喇見到啲燒鵝真係好靚喎，咁就叫咗一隻燒鵝同我老婆一齊食!

燒鵝

上菜嘅時候隻燒鵝真係好靚好肥美，見到層皮真係好靚呀，食落肉好鬆化，皮好香口，同出面肥到肥膏既燒鵝唔同，佢層肥好簿，原來真正嘅燒鵝係咁樣㗎，一個字正！
加埋碗湯瀨粉，好味😋，真係飽到上心口！