主打意粉、麵食同麻糬甜品，木系文青風，燈光柔和，超chill😎估唔到有任飲飲品吧，可選果茶梳打，仲要係一d都唔求其，好飲!
食物都同樣好好味，意粉調味同煮得都好有水準。
新鮮熱辣份量足，我地揀左加配沙律同餐湯🍜💖最後見到隔離枱好吸引，就開埋甜品胃食埋。
餐湯有2款選擇，我同同事分別各揀一款，黑松露蘑菇湯及法式番茄濃湯，濃郁好味道，跟湯嘅無花果蜜糖包都好食，連麵包都唔馬虎就知餐廳係幾講究✨
沙律同樣高質素，套餐加配分量都唔細，當日係凱撒沙律，超正！！
主菜方面我揀左個新品，忌廉辣肉腸醬意大利雲吞，醬汁濃郁creamy，意式雲吞我一向都好鐘意，加埋辣肉腸餡料，層次味道都好豐富，食落有少少辣但適中，表面鋪左芝士碎食落更香，大力推介。
同事揀大蝦黑松露忌麻蘑菇意粉，黑松露忌廉汁好味道，我地覺得比起一般西餐嘅黑松露汁好食得多，意粉彈牙al dente🍝，吸晒醬汁，掛汁啖啖好滋味！
我地加左脆炸阿拉斯加鱈魚手指，有質素，唔係大家想像一般個種實的的厚粉，而係外皮薄脆，入面嫩嫩滑口，脆香撲鼻，熱辣辣勁邪惡。
甜品方面，黑芝麻牛奶麻糬又係好味到爆，牛奶煙韌Q彈，類似糖不甩但又好食多幾個層次，加埋海量嘅黑芝麻碎，我地將牛奶麻糬切成小件，每件都幫佢地係黑芝麻海到滾黎滾去，每啖都係爆多黑芝麻，超超超好食。
抹茶雪糕麻糬拿玻崙，又係一個口感豐富好食嘅甜品，拿玻崙夠酥脆，兩樣疊食口感超match！雪糕麻糬嚼勁十足，兩者夾埋太過癮。
