牛角次男坊 (荃灣廣場) (已結業)

因為疫情，已經冇出街用膳一段日子，最近為著某d事心情十分低落，大大見我如此，破戒帶我出街食嘢，解吓鬱悶心情。喺街上四圍遊走期間，就被呢間餐廳宣傳海報上面嘅牛肉飯吸引住。雖然係下晝4點幾，餐廳入座率都有7成，我哋揀咗個同鄰枱中間有隔篷嘅位置坐低，期間侍應貼心地提供信封俾我哋放口罩點餐方面，呢度係半自助形式，需要自己先去前面櫃位落單，之後由侍應捧餐。呢段時間仲有下午茶套餐供應，價錢$49-$59，不過我就點咗主餐牌上面嘅套餐嚟試。今次叫咗個牛角次男坊丼定食，肉係美國草飼牛腹腩，d牛肉堆到成座山咁，賣相一流，非常吸睛，牛肉配埋燒汁，送飯一流，牛肉下面仲鋪有芽菜，唔會只係食肉咁膩。套餐包埋嘢飲同前菜，價錢$88，算係合理。