堅信號上海生煎皇 (花園街) (已結業)

依間店鋪由佢小店就食過，到依家有多間門市，菜式多左店內環境仲充滿特色，近期有永澤同學，小丸子迷唔好錯過喇～招牌上海生煎包必試，包底金黃酥脆而且皮薄，咬嘅時候一定要小心，因為真係好多湯汁，肉餡飽滿多汁，調味恰當，唔會覺得醬油味重，更加突顯肉質鮮味，加上蔥花同香脆黑芝麻點綴，味道口感層次都滿分。天氣熱芝麻醬五色冷麵成為主食首選，份量十足，五色有青瓜絲、火腿、蟹柳、雞絲、紅蘿蔔絲，顏色營養都超豐富，芝麻醬濃度剛好可以依偎麵身，每一啖都會食到芝麻醬，值得一讚係用黑芝麻帶黎脆口，一般會用花生碎，但黑芝麻會又香又脆而且不會哽牙，口感會更加好。酸辣湯雲吞都好有驚喜，酸度辣度好恰當，飲落好順喉，濃度也順滑，用料唔馬虎有豆腐、肉絲、木耳絲、笋絲、蛋花，雲吞皮薄爽滑，餡料係菜肉餡，咬落好新鮮，充滿菜香肉質爽，雲吞餡嘅調味唔會好重帶點菜清甜，同酸辣湯好夾。由小店到開分店最怕係味道不能保持，今次無令我失望，而且感覺到菜式上的用心，比預期更加有水準，唔會因爲招牌生煎包而忘記其他菜式。