天丼 (已結業)

舊陣時嘅越南菜就幫襯過，自從開咗天婦羅丼店都係第一次去食，每個set都好靚仔，我點咗華味鳥盛合，本身好鍾意食華味鳥，會去買一pack華味鳥雞腿肉就咁白烚都已經好好味，但就未食過天婦羅咗嘅佢。即叫即炸天婦羅要等12至20分鐘。餐嘅賣相好肆正，有幾張吸油紙墊住天婦羅幫助索油，無咁油膩，雞肉唔會柴，有肉汁，不過都係鍾意原汁原味，雞寶即雞肉丸，有調過味，反而有啲滑嘅口感，其他野菜天婦羅都好香脆，蘸加咗蘿蔔蓉嘅天婦羅汁解一解，香口脆而不膩。蕎麥冷麵好清爽，冷麵汁唔鹹。被開心果吸引住，跟餐點咗個滿記嘅開心樂園(同一店有埋滿記甜品，使乜去西貢)，四個人share試吓，香濃開心果醬汁入面有碎冰，透心涼，面頭有開心果仁碎配芋圓，Q彈又香脆，雙重口感，食少少凍嘢一解天婦羅嘅油炸感，每人食幾口甜品好滿足。