四哥車仔麵

营业中

休息中

今日剪完頭髮，見有啲肚餓，又未食晏，於是周圍行吓，睇吓有咩食。見到呢間舖食車仔麵，又好耐無食，於是就行入去試吓。入到去係舊式食肆裝修，有啲中學時代嘅味道，點了個三餸麵，分別係魚皮餃、咖哩魷魚同埋牛肚，要油麵底(個人覺得車仔麵配油麵係最正同最啱)，醬汁就要秘製小辣。先講隻魚皮餃，個人覺得啲皮淋咗啲，唔夠煙韌，跟住到牛肚，都幾入味，同埋都有咬口，然後到咖哩魷魚，覺得咖哩汁唔夠多同唔夠濃，比較一般。而油麵就正常，都幾多吓，反而佢個湯係幾好味，配埋辣汁唔錯，最終差唔多都飲咗半碗。整體嚟講，成碗麵都正常，係個湯比較出色，不過以30幾蚊嘅價錢算係唔錯。