台食館 (福榮街)

今日行開鴨寮街搵電子零件，轉角撞正呢間台灣餐廳，見個門口幾乾淨，肚仔又開始打鼓，一於入去會一會佢！點知唔試猶自可，一試直頭有驚喜——個「鐵路排骨便當」 ($58) 真心抵食到爛！

塊排骨大過我塊面，仲要係切好條狀，食落唔使儀態盡失～外皮炸到金黃酥脆，咬落「咔嚓」聲，入面啲肉卻keep住juicy，唔會乾爭爭似柴皮。個滷肉飯亦係神還原台灣風味，肉燥肥瘦均勻，醬汁撈飯真係一秒清碟！旁邊嘅酸辣木耳夠哂醒胃，成個set飽到上心口。

天氣涼涼哋，加$0轉熱飲夠貼心～杯「鮮檸檬紅玉」茶底甘香，檸檬清新唔澀，飲完成個人都暖笠笠。

總括嚟講，呢個價錢喺深水埗食到咁高質台灣便當，性價比爆燈！下次再嚟掃街，肯定encore～（溫馨提示：排骨即叫即炸，趕時間嘅話可能要等幾分鐘，但絕對值得！）