Bugis@叻沙・海南雞飯

营业中

休息中

今日陪阿媽行下 D2 place，行到咁上下就去3樓睇下有咩食，見到呢間對上一次行都未見過所以就諗住食呢間試下，我地7點半左右去到，好快就入得。個名都寫住海南雞飯就緊係試下佢個新加坡無骨海南雞飯，肉質幾嫩滑，油飯粒粒分明，個湯仲幾清甜有d栗米粒係度，唔會好油膩。呢個餐仲可以配一個小食，我揀左惹味沙嗲雞肉串，個沙嗲汁都幾好唔會好辣，雞肉都算嫩。然後配左一個免費飲品，凍既清新桔仔特飲，一開始覺得清新得黎帶點澀，愈飲愈甜，可能係我無搞好😂，但都幾鐘意飲。本來諗住嗌娘惹陳醋金沙骨飯，但點知賣哂，所以就嗌左醒胃冷烏冬配香茅雞扒。烏冬配料十足，酸菜好正，唔會話好酸，下低有d清湯都係酸酸地，成個感覺係好開胃，如果個烏冬再冷啲就更正。香茅雞扒就外脆內軟，肉質嫩滑。呢個套餐仲有碟唐生菜送，不過味道有d辣辣地。另外仲追加左個小食，南乳雞翼，南乳味十足，新鮮香脆肉質嫩滑，回味無窮。呢個就配左凍既清熱羅漢果水，甜中有點苦，如果羅漢果味可以重啲就更好，不過可能要熱先會重味啲。總括黎講，一個套餐可以食到好多野好多元化，好滿足，食物質素都高，值得一試。