LAB EAT Restaurant & Bar (金巴利道)

营业中

休息中

聽同事講韓國街有間西餐廳唔錯，呢日就同朋友去試吓先。餐包 - 落咗單就會送上餐包，個包夠熱，煙煙韌韌，點埋橄欖油同黑醋食好正呀!紐西蘭白酒，西班牙紅酒 - 我叫咗白酒，朋友就叫咗紅酒，我嗰杯酒微酸又富果味，配海鮮真係好夾。48個月西班牙火腿配哈蜜瓜 - 火腿係比較乾身鹹香嗰種，食到堅果香味，配埋超甜哈蜜瓜，帶出咗火腿嘅鮮味。海膽蒜蓉多士 - 海膽超大份同新鮮，每一啖都好甘香，配埋脆卜卜嘅多士，食到停唔到口。白酒煮忌廉汁藍青口 - 藍青口細細隻，好嫩滑，用白酒忌廉汁煮就剛剛好，帶出青口鮮味，附上嘅烘多士點埋啲汁食，一流! 炭燒紐西蘭羊鞍配香草蒜蓉汁 - 羊鞍燒得一啲都唔嚡，仲保留咗好多肉汁好鮮，配上芥末醬同薄荷醬，可以辟去羊肉嘅膻味，連我咁怕膻味嘅人都接受到，唔錯! 甜品拼盤 - 呢款甜品包括朱古力心太軟，雲呢拿雪糕，芒果慕絲，朱古力馬卡龍，開心果泡芙，啱晒心多多嘅人。一啖心太軟，一啖雪糕，冷熱一同享受，食完再食芒果慕絲，酸酸哋平衡返，再食埋馬卡龍同泡芙，完美嘅一餐。