禮賓閣餐廳

营业中

休息中

呢晚去咗位於銅鑼灣道嘅《禮賓閣餐廳》食晚飯。一般茶餐廳格局，我揀咗個沙薑雞飯，配熱咖啡，一共$57。落單嗰陣，我向侍應要求多沙薑，侍應話跟餐已經有。上到枱望一望碟雞，原來沙薑係預先加入啲雞度，食落鹹鹹地，沙薑味唔係好夠，雞味一般。肉質就因部位而定，下面嘅雞肉普遍都有啲嚡口，望落幾大碟，但其實下面係放左娃娃菜，雞肉係畀實際望落嘅少。我再向另一個侍應要求，想要一碟沙薑，講咗之後，佢都話係雞入邊已經有，當然亦係冇攞畀我。再隔咗陣，我同第三個侍應要求要一碟沙薑，佢先攞畀我。為咗要一碟沙薑，我要同三個侍應講先攞到，感覺難受。而且沙薑應該唔係一啲好明貴嘅嘢，而我係叫沙薑雞飯，要求沙薑應該係好合理嘅事，呢個餐亦唔算特別平，真係唔明點解咁辛苦先攞到。咖啡係一般茶餐廳貨色。經過今次嘅經驗，我諗我唔會再返嚟幫襯。