雖然食物款式唔可以話好多選擇, 但今晚點嘅菜式, 款款都滿有驚喜。
【龍井烤雞】HK$138
為餐廳招牌菜之一, 幾乎每檯客必點! 原隻雞上檯先滿足相機食先, 然後侍應取回廚房斬件。烤雞外皮烤得金黃均勻, 略帶點焦, 一咬外皮香脆, 散發濃郁龍井香氣, 除雞胸外, 雞肉都很嫩滑juicy, 果然稱得上人氣之選。
【雪菜酸湯魚片】HK$128
估唔到魚嘅份量會咁多, 無骨魚片嫩滑, 湯底酸尾尾帶微辣, 辣度溫和, 刺激味蕾, 美味開胃, 配上了吸了湯汁嘅雪菜、腐竹、豆芽, 入味又令口感多一點層次。
【蝦湯泡飯】HK$88
泡飯熱辣辣上檯, 米飯已加入湯底中浸泡著, 盡吸湯汁, 蝦粒份量偏少, 但湯汁極為鮮甜, 食之前自行加入脆米, 增加了口感層次。
最後點了兩款甜品做結尾:
【茶香奶凍】HK$28
奶凍面層為焦糖薄脆, 奶凍香滑, 散發陣陣清新茶香, 跟焦糖薄脆同時入口, 茶香中帶點焦糖嘅香甜, 正!
【綠茶餅】HK$28
原來為熱食甜品, 綠茶餅夾住了甜甜地嘅芋泥, 餅邊沾上了大量芝麻, 香口又不會太甜, 很喜歡。
