芝加哥串燒酒場

全晚最愛邪惡嘅紙鷂雞皮同午餐肉。 紙鷂雞皮大大塊，每一忽好酥脆透薄，食落比平時串埋嘅燒雞皮更加爽。 午餐肉厚切，燒得香口仲灑咗啲香料，啖啖肉好滿足。雞皮手打鮮蝦滑外皮酥脆，內裏爽口彈牙，中心仲串咗隻蝦，口感好豐富。 翠玉瓜新鮮多汁。大蔥雞肉串雞肉嫩滑，食到京蔥嘅新鮮juicy，一人一串都有encore嘅衝動。 豬頸肉燒得幾香，唔會過分肥，如果再燒燶啲就更加好。宮崎去骨雞腿貨真價實食到係比較靚嘅日本雞，欣賞雞皮完整地成塊都好脆，全部油脂都已經燒晒出嚟，好味。麻辣薯條有驚喜，薯條熱辣辣新鮮炸起夠乾爽，重點係個麻辣粉真係好好味，唔會太辣但好惹味，每條薯條都好均勻地包裹上辣粉，配埋芝士醬，就算好飽都食唔停口。全晚串燒價錢都唔貴，仲有啲特別款式，例如燒乳豬、燒鮑魚、燒牛胸爽，同朋友嚟傾吓計唔錯。