玉桃軒酒家 (康怡廣場) (已結業)

一向喺我心目中 有幾種食物 都係當你有一陣子冇食過 就會突然間非常之掛念同埋即刻想食,例如公仔麵, 魚蛋燒賣, 漢堡包薯條同埋可樂等, 今日同朋友 竟然一齊掛念同一樣 食物 -- 片皮鴨。早有聽聞玉桃軒嘅片皮鴨相當抵食同埋出名， 今日同朋友約咗喺大家返工嘅中間點 太古康怡玉桃軒 試試佢嘅虛實。 去餐廳時先上openrice睇下其他食家嘅食評， 見到有食家話試過大概七點零鐘去到片皮鴨已經賣曬， 好在當日大概七點半鐘到經理話依然仲有幾隻。 但到場時已經見到大概 一半以上嘅 枱都有點到片皮鴨， 可想而知佢嘅受歡迎程度。而家仲要做緊每隻228嘅優惠。侍應會即場將片皮鴨切片， 而當我哋見到隻鴨不約而同覺得隻鴨超大隻， 而且肥瘦比例剛剛好。 就係呢種味喇！ 絕對做到片皮鴨最重要嘅皮脆肉嫩 。鴨嘅油香簡直由你舌頭直通到鼻腔。為咗確保第日有便便， 我同我朋友都要叫返碟菜-- 欖菜四季豆炒龍利柳。欖菜夠香但唔會過鹹， 反而有啲甘嘅味道。 四季豆夠翠綠新鮮， 魚柳結實 鮮味。有咁嘅舒適環境同埋食物質素， 埋單每人200蚊， 大滿足！