牛大人台灣火鍋吃到飽

营业中

休息中

我發現依家啲任食火鍋都有一個共通點，就係啲選擇多到係唔會食得晒😆。作為台式火鍋放題代嘅牛大人都唔例外。雖然今次喺將軍澳店揀咗一個比較高級嘅日本黑毛和牛A4+吃到飽套餐($448起，平日訂位再有折)，但估唔到最後根本冇出去配料區攞任何嘢就已經夠晒。現實係，當坐低揀咗火鍋湯底(今次揀嘅係胡椒豬肚鍋)後，職員便會遞上一大盤A4+黑毛和牛、一大盤伊比利亞黑毛豬、一大盤海鮮 (包括好大隻生蠔、鮑魚、小龍蝦同扇貝)、仲有超好食嘅澳洲M9和牛牛丸。嗰陣我哋仲好有自信咁scan QR code繼續落單，原因係QR code可以落嘅嘢食都好吸引，包括三種即食鮑魚(柚子、葱鹽、冰鎮)、海蝦沙白、好多種海鮮滑等等。仲未計佢又出邊飲品櫃以外嘅飲品，包括鴨屎香檸檬茶同珍珠奶茶等…嚟到呢度，其實已經成枱嘢食，非常豐富。但其實呢度嘅A4+和牛同其他肉類都可以任叫任食，實在太誇張。所以，縱然出邊仲有非常豐富嘅蔬菜丸類配料、飲品多到睇唔晒嘅飲品櫃、特別版Dreyer’s同Kitkat雪條、特色滷肉飯等等，最後我哋只係喺出邊攞咗無糖嘅自家製白桃烏龍同桂花烏龍試吓，就已經投晒降了。斟多杯養生桂圓紅棗茶，大滿足。