呢一間喺銅鑼灣希雲街街尾嘅隱世手工漢堡包店，睇個門面裝修已經好美式復古，吸睛度爆燈！
睇下舖入面貼嘅資料，知道老闆原來大有來頭！係節目最紅大廚嘅冠軍呀！🏆
咁猛料！一場嚟到點都要試試佢！🍔🍟🥤
🐷 豬西．班牙漢堡 （$88）
sorry原諒我笑點低，一望到個菜名真係笑咗🤪
第一下我諗到係豬肉加芫茜，係啱嘅，但原來仲有第二層意思，就係豬肉係西班牙栗飼豬，個名食到咁應，一於會一會！
漢堡包選用法國奶油麵包，漢堡包除咗餡料其實個包都好重要，Sick Burger絕對有顧及到呢一點！包包外脆內軟，牛油香濃，帶有少少甜味，用心真係可以從細節睇得見！
餡料除咗西班牙栗飼豬腩肉外，仲有八珍甜醋醬、焦糖菠蘿片、芫茜、炸豬皮，非常足料！西班牙豬咬落食到一絲絲嘅肉絲質感，甜酸搭配下唔肥膩！
反而我幾期待嘅芫茜同炸豬皮作用不大~
🐮 撚手牛肉漢堡（$95／單層）
叫得撚手就知佢幾有信心！
見菜單可以揀牛肉1/2/3層，建議一般胃口嘅女孩子點單層都已經好夠，因為就算單層都係一口咬唔曬，太足料啦😂
呢一個漢堡餡料有手打安格斯牛肉、流心太陽蛋、煙肉、燒烤醬、生菜、洋蔥、碎蕃茄🍔
牛肉食得出真係手打，肉汁豐富牛味香濃！
整隻流心太陽蛋落去真係神來之筆！蛋汁可以好柔和咁linking所有食材🍳我覺得如果係好橙色嘅蛋會更加開心！
洋蔥不得不讚！🧅香口脆身，洋蔥獨有嘅清爽調和到成件事嘅油膩感，同埋洋蔥味好出，又唔會好辣，同牛肉好夾！
另外生菜同蕃茄都好爽脆！從呢啲細節位睇到呢間嘢真係好有心思，我好欣賞🍅🥬
🍟 金沙黃紫菜薯條（+＄44）
食得Burger，薯條又點可以少？
呢個薯條嘅金沙aka鹹蛋黃醬起曬沙，如果係鹹蛋愛好者一定要試！薯條粗身所以可以蘸到好多汁醬，香脆熱辣辣，一口大滿足！
不過紫菜係呢度冇乜作用......
🥗 凱撒沙律 （+$34）
呢餐太多煎炸嘢所以想食啲菜lol
凱撒沙律就係凱撒沙律囉😂有菜有麵包粒有芝士有煙肉，份量gentle！係薯條同炸雞以外嘅清新之選
🥤 華牛奶Sick（+＄52）
美式Burger就係要跟Milk Shake！新口味叫華牛奶Sick，由阿華田、朱古力雪糕加上3.9 牛奶製作，配上新鮮雲呢拿籽、Cocoa nibs、仲有朱古力曲奇、脆脆，啱晒「朱古力狂迷」！
朱古力味香濃，口感厚重，啖啖都啜到唔同材料，而味道都幾甜膩下（啱㗎！奶昔就係要咁！）
🍋🟩 青檸梳打（跟餐免費）
櫃台會俾你一個有青檸+薄荷葉嘅杯，自己去飲品櫃拎罐玉泉梳打水斟嚟飲
跟餐免費嚟講都算幾有心思，唔係就咁俾罐汽水客人就算
Burger嚟講唔平，但食得出每一樣細節都講究，追求盡善盡美，見到舖頭仲周不時會推出新口味，誠意滿滿！
而SICK呢個字喺呢度出現得太多次，所以我好好奇點解，網上搵到老闆接受訪問時親自解畫！
//Chef Lai：「Sick」在英國不只「病」的意思，很多人會說「this is so sick!」，其實是說「嘩！呢個正！」，所以我用了這個字來做店名，希望大家吃過我的漢堡都會大讚：「正！」； 另外「Sick」跟廣東話「食」這個音很像，所以簡單一點，「Sick！Burger」等於是「食漢堡」。//
9
1
35
6
