富園冰室

营业中

休息中

香港傳統嘅茶餐廳愈來愈少，反而開咗好多冰室。唔知大家會唔會食茶餐廳嘅辣椒醬呢？如果有嘅話，應該會發現好多茶餐廳為左節省成本都唔再放一大樽出嚟，而係轉咗用細包裝。今日我去咗馬鞍山嘅富園冰室食早餐，就食到最好食既嘅港式茶餐廳辣椒醬。第一次去一間茶餐廳食早餐，我都一定會先食佢嘅沙嗲牛肉麵，呢樣每間茶記都有嘅嘢食。而最特別嘅係，唔知點解，茶餐廳入面嘅沙嗲牛肉麵都係B餐，我食過好多間都係咁。沙嗲牛肉麵幾好食，牛肉嘅沙嗲味夠濃，湯底加入左花生醬同花生碎，另外個餐仲配牛角包；而呢個餐嘅精華係辣椒醬。佢仲係保持住傳統茶餐廳一大樽俾人任落。每一間茶餐廳嘅辣椒醬就好似韓國餐廳嘅泡菜一樣，味道間間都唔同，因為每間都有自家製嘅秘方。呢間餐廳嘅辣椒醬加入咗蒜蓉，而且辣度適中，加埋落碗麵真係好好食，大家可以一試。另外，扒餐都好大碟，沙律有加麻醬，吉列魚柳既千島醬係水準之上。不過，我仍然推介返沙嗲牛肉麵，真係一絕！