德福閣

营业中

休息中

前兩日夜晚同屋企人一齊去旺角呢間酒店餐廳食自助餐。大約三百幾蚊一位，價錢算抵食。每人入座嗰陣會送四隻生蠔，呢個價錢雖然唔係任食生蠔，但有生蠔食都已經算幾抵食。一般自助餐有嘅刺身、壽司、凍海鮮、沙律、水果、熟食同甜品呢幾大種類，呢度都每種都有啲。我encore得比較多嘅係parma ham配哈密瓜同埋蒸魚。Parma ham嘅鹹香配埋清甜嘅哈密瓜，作為前菜幾好。其他食物大致同其他自助餐都差唔多，我都每樣食少少咁。不過我覺得呢度比較出色嘅係甜品，有即製疏乎厘同埋即製嘅pancake。因為係即製嘅關係，疏乎厘嘅外皮比較香脆，食落有淡淡的檸檬香。至於即製嘅pancake，外皮好薄，材料可以自己揀，包括柚子、忌廉、香蕉同埋提子乾等等，醬汁亦都可以揀朱古力醬或者芒果醬。其他甜品亦都有cheese cake、芒果mousse cake、焦糖燉蛋、芝士撻同埋apple crumble等等，仲有朱古力噴泉。個芒果mousse cake比我想像中好食，酸酸甜甜好開胃，食完一件仲想食第二件。最後另一個抵食嘅地方喺呢度有任食嘅Movenpick，食返幾隻味就好滿足。