1
湯底我揀咗養生蟲草花桃膠雞涮涮鍋，一上枱就聞到好香藥材味，落料之前忍唔住飲咗兩啖，清甜得嚟好暖胃，桃膠煮耐咗滑溜溜，感覺自己好似食緊美容套餐咁！朋友嗰邊麻辣鴨血凍豆腐鍋都唔輸蝕，鴨血入味又彈牙，麻辣湯底唔會死鹹，涮肉一流。
主角方面，Prime牛頸脊雪花均勻，輕輕一淥已經好軟嫩，牛味濃得嚟唔膩；伊比利亞黑毛豬果然名不虛傳，肉質爽甜，完全冇豬膻味。海鮮拼盤有蝦、蜆、魷魚等等，樣樣都幾新鮮，尤其係蝦，爽口彈牙！其他火鍋料同蔬菜款式都多，擺得整整齊齊，自助區乾淨。
小食都要讚一讚！有即炸香脆嘅番薯條，熱辣辣上枱，仲有四隻味嘅shake shake包裝畀你任shak,，香口到停唔到手。仲有涼拌小食好似木耳、青瓜，酸酸辣辣好開胃。出邊櫃仲有多款雪糕任拎任食。菜類好驚喜連羽衣甘藍都有得食，都好重本。
飲品區好有驚喜有Qoo同mini版維他朱古力，而且係有保溫櫃！仲有自家煲嘅飲品，清甜解膩，打邊爐飲一流，當然唔少得台式飲品。
環境方面，座位闊落，唔會逼手逼腳，裝修以木系為主，光線柔和，幾有台灣嗰種悠閒感。雖然坐滿人，但抽風系統做得唔錯，食完都唔會成身油煙味。服務生態度幾好，換碟、加湯都快手。
整體嚟講，以三百零蚊任食呢個質素，真心抵食！養生湯底加分，同朋友慢慢烚下烚下，吹水唔駛趕，滿足感爆棚～
