泰玖 (已結業)

所謂 塞翁失馬焉知非福，搵錯餐廳排咗半個鐘隊，最後去咗附近呢間泰菜餐廳。入到去有個好特別嘅日式居酒屋嗰種Bar枱，用餐地方喺二樓。坐底發現餐牌有好多選擇，有泰式生蝦、青木瓜沙律、咖喱海鮮、串燒等等，選擇好多。最終選擇左牛腩青咖喱，青木瓜沙律，仲有一個最特別、但係唔記得咗影相嘅蟹肉蛋捲。青咖喱味道比較溫和，唔會太辣，牛腩不過不失，本來叫咗個薄餅諗住配咖喱食，最後發現薄餅唔係好啱口味，係似中式薄撐嗰種，唔係好適合配咖喱 。青木瓜沙律，上面嘅鮮蝦好新鮮，調味同青咖喱一樣都係比較溫和，唔太辣，酸酸甜甜好開胃。最後嘅蛋捲份量好大，一個大嘅蛋捲設成五件入邊有真蟹肉亦都混合左蟹柳，再加啲魚子同紫菜喺上面整體味道搭配得比較好，唯一要注意嘅係應該係煎蛋嘅時候落得比較多油最旁邊嘅兩塊入口就會成口油，唔鍾意食油膩嘢嘅朋友，要注意下啦。最後埋單兩位食四百幾蚊，同一個二人餐價錢差唔多，諗返，應該叫二人餐比較抵。整體嚟講環境加食物質素都唔錯，對得起價錢亦都係一個適合聚會嘅地方。