南龍粥店

去旅行食大咗個胃，就連身型都提升至另一個層次，就連班friend話約船P，都唔敢現身，所以喺時候食得簡單啲！講到簡單，粥絕對係一個唔錯嘅選擇，但煲粥卻其實一啲都唔簡單。今日嚟到旺角竟然能夠抵擋唔少美食嘅誘惑，選擇咗南龍粥店。

煎蘿蔔糕
蘿蔔糕即叫即煎，大大件，仲有少少蘿蔔絲增加口感。

銀芽炒麵
顧名思義，銀芽炒麵嘅配料就只係得芽菜，所以其實個焦點落返喺個麵度。每條炒麵都掛上豉油，鹹香度十足。

即蒸滑牛肉腸粉
腸粉即叫即蒸，用上新鮮滑牛做餡料 ，腸粉皮夠滑。

生滾滑雞粥
粥底綿滑，粥上面帶有少少雞油，雞味濃郁。

鳳爪排骨飯
鳳爪排骨填滿晒成個飯盅，份量十足，至於精華當然係個飯度，加埋煮過嘅豉油，每一啖飯都有油香味。